ଅହମଦାବାଦ,୨୩ା୨- ଚଳିତ ଟି୨୦ ବିଶ୍ୱକପ୍ରେ ଦକ୍ଷିଣ ଆଫ୍ରିକାଠାରୁ ସୁପର-୮ ମ୍ୟାଚ୍ରେ ପରାଜୟ ପରେ ଭାରତୀୟ ଦଳର ଟପ୍ ଅର୍ଡରରେ ବଡ଼ ପରିବର୍ତ୍ତନ ହୋଇପାରେ। ଏ ନେଇ ଭାରତୀୟ ଦଳର ବ୍ୟାଟିଂ କୋଚ୍ ସୀତାଂଶୁ କୋଟାକ ସଙ୍କେତ ଦେଇଛନ୍ତି।
ଦକ୍ଷିଣ ଆଫ୍ରିକାଠାରୁ ମିଳିଥିବା ୭୬ ରନର ବଡ଼ ପରାଜୟ ଯୋଗୁ ଭାରତୀୟ ଦଳକୁ ବର୍ତ୍ତମାନ ତା’ର ପରବର୍ତ୍ତୀ ଦୁଇ ମ୍ୟାଚ୍ରେ ନିଶ୍ଚିତ ବିଜୟ ଦରକାର। ଏଭଳି ପରିସ୍ଥିତିରେ ଫର୍ମରେ ନ ଥିବା ବ୍ୟାଟରଙ୍କୁ ଟପ୍ ଅର୍ଡରରୁ ବାଦ୍ ଦିଆଯାଇପାରେ ବୋଲି ଆଶା କରାଯାଉଛି। ବିସ୍ଫୋରକ ଓପନର ଅଭିଷେକ ଶର୍ମା ୪ ମ୍ୟାଚ୍ରେ ୧୫ ରନ କରିଥିବା ବେଳେ ତିଲକ ବର୍ମା ୧୧୮ ଷ୍ଟ୍ରାଇକ୍ରେଟ୍ରେ ୧୦୭ ରନ କରିଛନ୍ତି। ଫିନିଶର ଭାବେ ଖେଳୁଥିବା ରିଙ୍କୁ ଏପର୍ଯ୍ୟନ୍ତ ୨୯ ବଲରେ ୮୨.୭୫ ଆଭରେଜରେ ୨୪ ରନ କରିଛନ୍ତି।
ମୁଖ୍ୟ କୋଚ୍ ଓ ଟିମ୍ ମ୍ୟାନେଜମେଣ୍ଟ ଅନୁଭବ କରେ, ଆମକୁ କିଛି ଭିନ୍ନ କରିବାର ଅଛି, ତେବେ ଆମେ ନିଶ୍ଚିତ କରିବୁ। ଯଦି ଆମକୁ ପରିବର୍ତ୍ତନ କରିବାର ଅଛି, ତେବେ ଆମେ କ’ଣ ବଦଳାଇବାର ଚିନ୍ତା କରିବାକୁ ପଡ଼ିବ। ଦଳରେ ସ୍ପେଶାଲିଷ୍ଟ ବ୍ୟାଟର ଉପଲବ୍ଧ ନ ଥିବା ଚିନ୍ତାର ବିଷୟ। ଏଥିଯୋଗୁ ସଞ୍ଜୁ ସାମସନଙ୍କୁ ଟପ ଅର୍ଡରରେ ସୁଯୋଗ ଦିଆଯାଇପାରେ। ଯାହା ଫଳରେ ଦଳକୁ ଟପ ଅର୍ଡରରେ ଜଣେ ଡାହାଣହାତୀ ବ୍ୟାଟର ମିଳିପାରିବ। ଆଗକୁ ଦୁଇଟି ଗୁରୁତ୍ୱପୂର୍ଣ୍ଣ ମ୍ୟାଚ୍ ଥିବାରୁ ଏ ସମ୍ପର୍କରେ ମ୍ୟାନେଜମେଣ୍ଟ ମଧ୍ୟରେ ନିଶ୍ଚିତ ଆଲୋଚନା ହେବ ବୋଲି କୋଟାକ କହିଛନ୍ତି। ଏହା ବ୍ୟତୀତ ଅକ୍ଷରଙ୍କ ବଦଳରେ ଓ୍ବାଶିଂଟନ ସୁନ୍ଦରଙ୍କୁ ଚୟନ କରାଯିବା ସମ୍ପର୍କରେ ସେ ପ୍ରକାଶ କରିଛନ୍ତି ଯେ, ଦକ୍ଷିଣ ଆଫ୍ରିକା ଦଳରେ ୩ ବାମହାତୀ ବ୍ୟାଟର ଥିବାରୁ ଦଳକୁ ଜଣେ ଅଫ୍ ସ୍ପିନରଙ୍କ ଆବଶ୍ୟକତା ରହିଥିଲା। ଏଥିଯୋଗୁ ଓ୍ବାଶିଂଟନଙ୍କୁ ଚୂଡ଼ାନ୍ତ ଏକାଦଶରେ ସାମିଲ କରାଯାଇଥିଲା। ହେଲେ ଆମକୁ ଆରମ୍ଭରୁ ଉଇକେଟ ମିଳିଥିଲା। ଏଥିଯୋଗୁ ଓ୍ବାଶିଂଟନ ପାଓ୍ବରପ୍ଲେରେ ବୋଲିଂ କରି ନ ଥିଲେ। ମାତ୍ର ତାଙ୍କୁ ପାଓ୍ବରପ୍ଲେରେ ବୋଲିଂ କରିବା ଲାଗି ଚୟନ କରାଯାଇଥିଲା। ଏଣୁ ମ୍ୟାଚ୍ର ପରିସ୍ଥିତି ଆଧାରରେ ଯୋଜନାରେ ପରିବର୍ତ୍ତନ କରାଯାଇଥିଲା।
