ଅଲିମ୍ପିକ୍ସ ଏବଂ ବିଶ୍ୱ ଚାମ୍ପିୟନଶିପ୍ରେ ବ୍ରୋଞ୍ଜ ପଦକ ବିଜେତା ବିଜେନ୍ଦର ସିଂ ପେସାଦାର ବକ୍ସିଂ କ୍ୟାରିୟରରେ ମଧ୍ୟ
ସଫଳତାର ସହ ଆଗକୁ ବଢ଼ୁଛନ୍ତି। ଘାନାର ଏଲିଆସ୍ ସୁଲେଙ୍କୁ ପରାସ୍ତ କରି ସେ ପେସାଦାର ବକ୍ସିଂରେ ୧୪ ଫାଇଟ୍ରୁ ୧୩ରେ ବିଜୟ ହାସଲ କରିଛନ୍ତି…
ଭାରତୀୟ ଷ୍ଟାର ବକ୍ସର ବିଜେନ୍ଦର ସିଂ ପୂରା ଷ୍ଟାଇଲରେ ରିଙ୍ଗ୍କୁ ପ୍ରତ୍ୟାବର୍ତ୍ତନ କରିଛନ୍ତି। ଜଙ୍ଗଲ ରମ୍ବଲ ଲଢ଼େଇରେ ଘାନାର ଏଲିଆସ୍ ସୁଲେଙ୍କୁ ପରାସ୍ତ କରିବା ସହିତ ପ୍ରୋ ବକ୍ସିଂରେ ୧୩ ତମ ବିଜୟ ରେକର୍ଡ କରିଛନ୍ତି। ବକ୍ସିଂରେ ଭାରତକୁ ଏହାର ପ୍ରଥମ ଅଲିମ୍ପିକ୍ସ ଓ ବିଶ୍ୱ ଚାମ୍ପିୟନଶିପ ପଦକ ଜିତାଇଥିବା ବିଜେନ୍ଦର ନିଜ ଉଚ୍ଚତାର ଫାଇଦା ଉଠାଇବା ସହିତ ୫ ମିନିଟ୍ ୭ ସେକେଣ୍ଡରେ ଏହି ମୁକାବିଲାକୁ ଜିତି ନେଇଥିଲେ। ୮ଟି ମ୍ୟାଚରୁ ଶତ ପ୍ରତିଶତ ବିଜୟ ରେକର୍ଡ ରଖିଥିବା ଘାନାର ଏଲିଆସ୍ ସୁଲେଙ୍କୁ ମ୍ୟାଚର ଦ୍ୱିତୀୟ ରାଉଣ୍ଡରେ ପରାସ୍ତ କରିଥିଲେ ବିଜେନ୍ଦର। ଆରମ୍ଭରୁ ସମ୍ପୂର୍ଣ୍ଣ ଆତ୍ମବିଶ୍ୱାସର ସହିତ ରିଙ୍ଗ୍କୁ ଆସିଥିଲେ ଭାରତର ଏହି ତାରକା ବକ୍ସର। ସିଦ୍ଧୁ ମୁସଓ୍ବୋଲାଙ୍କ ସୋ ହାଇ ଗୀତ ଜରିଆରେ ସେ ଏଣ୍ଟ୍ରି କରିଥିଲେ। ଶକ୍ତିଶାଳୀ ପଞ୍ଚ ଏବଂ ଜାବ୍ ସହିତ ଭିଓ୍ବାନୀର ଏହି ୩୬ ବର୍ଷୀୟ ବକ୍ସର ସହଜ ବିଜୟ ହାସଲ କରିଥିଲେ। ମ୍ୟାଚର ଦ୍ୱିତୀୟ ରାଉଣ୍ଡରେ ସୁଲେ ଆକ୍ରମଣ କରିଥିବା ବେଳେ କାଉଣ୍ଟର ଆଟାକ୍ ସହିତ ବିଜେନ୍ଦର ବାଜି ମାରିଥିଲେ। ପ୍ରୋ ବକ୍ସିଂରେ ବିଜେନ୍ଦରଙ୍କର ଏହା ଥିଲା ୧୪ତମ ଫାଇଟ୍ ଏବଂ ୧୩ ତମ ବିଜୟ। ଗତବର୍ଷ ମାର୍ଚ୍ଚରେ ରୁଷିଆର ଆର୍ଟିଶ ଲୋପସାନଙ୍କ ବିପକ୍ଷରେ ନିଜ ପେସାଦାର କ୍ୟାରିୟରର ଏକମାତ୍ର ପରାଜୟ ସ୍ବୀକାର କରିଥିଲେ।
