ନୂଆଦିଲ୍ଲୀ,୨୪।୧୨: ଭାରତୀୟ ବାୟୁ ସେନା (ଆଇଏଏଫ୍)ର ଏକ ମିଗ୍-୨୧ ଫାଇଟର ଜେଟ୍ ଶୁକ୍ରବାର ସନ୍ଧ୍ୟାରେ ରାଜସ୍ଥାନର ଜେସଲମେରରେ ଖସି ପଡ଼ିଛି। ବିମାନର ପାଇଲଟଙ୍କ ପତ୍ତା ମିଳିନାହିଁ। ତାଙ୍କୁ ଠାବ କରିବା ଲାଗି ସର୍ଚ୍ଚ ଅପରେଶନ ଜାରି ରହିଛି ବୋଲି ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି। ଦୁର୍ଘଟଣାର ସଠିକ୍ ସ୍ଥାନ ଏପର୍ଯ୍ୟନ୍ତ ସ୍ପଷ୍ଟ କରାଯାଇନାହିଁ।
ଜେସଲମେର ସାମ ଥାନା ଅନ୍ତର୍ଗତ ଜାତୀୟ ମରୁଭୂମୀ ଉଦ୍ୟାନ ଅଞ୍ଚଳରେ ବିମାନ ଦୁର୍ଘଟଣା ଘଟିଥିବା ଏସ୍ପି ଅଜୟ ସିଂ କହିଛନ୍ତି।
ଦୁର୍ଘଟଣା ଖବରକୁ ଆଇଏଏଫ୍ ଟୁଇଟ୍ କରି ସ୍ପଷ୍ଟ କରିଛି। “ଆଜି ସନ୍ଧ୍ୟା ପ୍ରାୟ ୮ଟା ୩୦ରେ ଏକ ମିଗ୍-୨୧ ଯୁଦ୍ଧବିମାନ ଉଡାଣ ଟ୍ରେନିଂ ବେଳେ ପଶ୍ଚିମାଞ୍ଚଳ ସେକ୍ଟରରେ ଦୁର୍ଘଟଣାଗ୍ରସ୍ଥ ହୋଇଛି। ପରବର୍ତ୍ତୀ ସମୟରେ ଅଧିକ ତଥ୍ୟ ଦିଆଯିବ। ଏ ଘଟଣାର ତଦନ୍ତ ନିର୍ଦ୍ଦେଶ ଦିଆଯାଇଛି” ବୋଲି ଆଇଏଏଫ୍ ପକ୍ଷରୁ ଟୁଇଟ୍ କରାଯାଇଛି। ଉଲ୍ଲେଖଯୋଗ୍ୟ, ୧୯୭୧ରୁ ସେନା ଦ୍ୱାରା ଏହି ବିମାନ ବ୍ୟବହୃତ ହୋଇଆସୁଛି। ସେବେଠାରୁ ୨୦୧୨ ମଧ୍ୟରେ ୪୮୨ ମିଗ୍ ଯୁଦ୍ଧବିମାନ ଦୁର୍ଘଟଣା ଗ୍ରସ୍ତ ହୋଇଥିବା ବେଳେ ଏଥିରେ ୧୭୧ ପାଇଲଟ, ୩୯ ସାଧାରଣ ନାଗରିକ, ୮ ସେନା ଅଧିକାରୀ ଓ ଜଣେ ଏୟାର କ୍ରୁ ମେମ୍ବରଙ୍କ ଜୀବନ ଯାଇଛି।
