ନୂଆଦିଲ୍ଲୀ,୬ ।୧୧: ଚିଫ୍ ଅଫ୍ ଡିଫେନ୍ସ ଷ୍ଟାଫ୍(ସିଡିଏସ୍) ଜେନରାଲ ବିପିନ ରାୱତ ଶୁକ୍ରବାର କହିଛନ୍ତି ପୂର୍ବ ଲଦ୍ଦାଖରେ ପ୍ରକୃତ ନିୟନ୍ତ୍ରଣ ରେଖା(ଏଲ୍ଏସି) ନିକଟରେ ଏବେବି ସ୍ଥିତି ଉତ୍ତେଜନାପୂର୍ଣ୍ଣ ରହିଛି । ସେ ଆହୁରି ମଧ୍ୟ କହିଛନ୍ତି ଜମ୍ମୁ-କଶ୍ମୀରରେ ପାକିସ୍ତାନ ଲଗାତାର ଛାୟା ଯୁଦ୍ଧ ଓ ଭାରତ ବିରୋଧରେ ଘୃଣ୍ୟ ବୟାନବାଜି ଯୋଗୁ ଭାରତ-ପାକିସ୍ତାନର ସମ୍ପର୍କ ଖରାପ ହେବାରେ ଲାଗିଛି । ନ୍ୟାଶନାଲ ଡିଫେନ୍ସ କଲେଜ ଦ୍ୱାରା ଆୟୋଜିତ ଡାଇମଣ୍ଡ ଜୁବଲି, ୨୦୨୦ରେ ସେ ଏହା କହିଛନ୍ତି । ରାୱତ ଆହୁରି ମଧ୍ୟ ଚାଇନାକୁ ଚେତାବନି ଦେବା ଭଳି କହିଛନ୍ତି ଏଲ୍ଏସିରେ କୌଣସି ପରିବର୍ତ୍ତନକୁ ଭାରତ ବରଦାସ୍ତ କରିବ ନାହିଁ । ପୂର୍ବ ଲଦ୍ଦାଖରେ ଏଲ୍ଏସିରେ ଏବେବି ସ୍ଥିତି ଉତ୍ତେଜନାପୂର୍ଣ୍ଣ ରହିଥିବାରୁ ଯେ କୌଣସି ସମୟରେ ସଂଘର୍ଷକୁ ଏଡାଇ ଦିଆଯାଇ ନ ପାରେ । ସୂଚନାଯୋଗ୍ୟ, ସେଠାରେ ହାଡଭଙ୍ଗା ଥଣ୍ଡାରେ ବି ଯେ କୌଣସି ପରିସ୍ଥିତିର ସାମ୍ନା କରିବାକୁ ଦେଶର ପ୍ରାୟ ୫୦ ହଜାର ବୀର ଯବାନ ମୁତୟନ ରହିଛନ୍ତି ।
