ନୂଆଦିଲ୍ଲୀ/ଓ୍ବାଶିଂଟନ,୨।୨ : ଭାରତ ଏବଂ ଆମେରିକା ମଧ୍ୟରେ ୩ ବିଲିୟନ ଡଲାରର ବଡ଼ ପ୍ରତିରକ୍ଷା ଚୁକ୍ତି ଶୀଘ୍ର ହୋଇପାରେ। ଏହି ଚୁକ୍ତି ଅନୁଯାୟୀ ଭାରତକୁ ଆମେରିକାରୁ ୩୦ ଏମକ୍ୟୁ-୯ବି ପ୍ରିଡେଟର ଡ୍ରୋନ କିଣିବ। ଏହି ଚୁକ୍ତି ସହିତ ଭାରତର ଏଲଏସି ଏବଂ ଭାରତ ମହାସାଗରର ତଦାରଖ କ୍ଷମତା ବୃଦ୍ଧି ପାଇବ ଏବଂ ସୁରକ୍ଷା ବ୍ୟବସ୍ଥା ସୁଦୃଢ଼ ହେବ।
ଏହି ଚୁକ୍ତି ସମ୍ପର୍କରେ ଗତ ପାଞ୍ଚ ବର୍ଷ ଧରି ଦୁଇ ଦେଶ ମଧ୍ୟରେ ଆଲୋଚନା ଚାଲିଛି। ଭାରତର ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ମଧ୍ୟ ଆମେରିକା ଗସ୍ତରେ ଅଛନ୍ତି ଏବଂ ଏହି ଚୁକ୍ତି ସମ୍ପର୍କରେ ଆମେରିକାର ଅଧିକାରୀ ତଥା ସେଠାରେ ଜାତୀୟ ସୁରକ୍ଷା ପରାମର୍ଶଦାତା ଜ୍ୟାକ ସଲିଭାନଙ୍କ ସହ ମଧ୍ୟ ଆଲୋଚନା କରିଛନ୍ତି।
ଯେତେବେଳେ ଏହି ଡିଲ ବିଷୟରେ ପଚରାଗଲା, ଆମେରିକାର ରାଜନୈତିକ ପ୍ରତିରକ୍ଷା ବ୍ୟାପାରର ମୁଖ୍ୟ ଜେସିକା ଲୁଇସ କହିଛନ୍ତି ଯେ ଆମେ ଏହି ଡିଲ ଉପରେ ପାଞ୍ଚ ବର୍ଷ ଧରି ଆଲୋଚନା କରୁଛୁ ଏବଂ ବର୍ତ୍ତମାନ ବଲ ଭାରତ କୋର୍ଟରେ ଅଛି। ତେବେ ସେ ଏହି ଡିଲ ବିଷୟରେ ଅଧିକ ବିବରଣୀ ଦେବାକୁ ମନା କରି ଦେଇଛନ୍ତି।
ରିପୋର୍ଟ ହୋଇଛି ଯେ ଉଭୟ ଭାରତ ଏବଂ ଆମେରିକା ଚାହୁଁଛନ୍ତି ଯେ ଏହି ଡିଲ ଯଥାଶୀଘ୍ର ଚୂଡାନ୍ତ ହେଉ ଯାହା ଦ୍ୱାରା ଶୀଘ୍ର ଭାରତକୁ ପ୍ରିଡେଟର ଡ୍ରୋନ ଯୋଗାଇ ଦିଆଯାଇପାରିବ। ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କ ସରକାର ମଧ୍ୟ ଏହି ଚୁକ୍ତିନାମାକୁ ଶୀଘ୍ର ଚୂଡ଼ାନ୍ତ କରିବାକୁ ଚାହୁଁଛନ୍ତି କାରଣ ଏହି ଡିଲ ଆମେରିକାରେ ନିଯୁକ୍ତି ବୃଦ୍ଧି କରିବ ଏବଂ ତାଙ୍କ ସରକାର ମଧ୍ୟ ଏହି ଡିଲକୁ ନିଜର ସଫଳତା ଭାବରେ ଉପସ୍ଥାପନ କରିବାକୁ ଚାହୁଁଛନ୍ତି ଯାହା ଦ୍ୱାରା ଆସନ୍ତା ବର୍ଷ ନିର୍ବାଚନରେ ଏହାର ଫାଇଦା ନିଆଯାଇପାରିବ।
୨୦୧୭ ମସିହାରେ ଏହି ଡ୍ରୋନ କ୍ରୟ ପାଇଁ ଭାରତ ଆଲୋଚନା ଆରମ୍ଭ କରିଥିଲା ଏବଂ ବର୍ତ୍ତମାନ ଏହି ଚୁକ୍ତି ଶୀଘ୍ର ଶେଷ ହେବ ବୋଲି ଆଶା କରାଯାଉଛି।
