ନୂଆଦିଲ୍ଲୀ,୧୪।୧୦ : (୦୧) ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର କହିଛନ୍ତି ଦେଶରେ ୨୦୩୬ ଅଲିମ୍ପିକ୍ସ ଆୟୋଜନ ପାଇଁ ଭାରତ ସମସ୍ତ ଉଦ୍ୟମ କରିବାକୁ ପ୍ରସ୍ତୁତ। କାରଣ ଏହା ୧୪୦ କୋଟି ଭାରତୀୟଙ୍କ ସ୍ବପ୍ନ। ଅନ୍ତର୍ଜାତୀୟ ଅଲିମ୍ପିକ କମିଟିର ଅଧିବେଶନ ଉଦଘାଟନ କରିବାବେଳେ ପ୍ରଧାନମନ୍ତ୍ରୀ ମୋଦି କହିଛନ୍ତି, ମୁଁ ୧୪୦ କୋଟି ଭାରତୀୟଙ୍କ ଭାବନା ଆପଣଙ୍କ ସମ୍ମୁଖରେ ଉପସ୍ଥାପନ କରିବାକୁ ଚାହେଁ। ୨୦୩୬ ଅଲିମ୍ପିକ୍ସକୁ ନିଜ ମାଟିରେ ଆୟୋଜନ କରିବା ପାଇଁ ଭାରତ ନିଜର ଉଦ୍ୟମ ଜାରି ରଖିଛି।
ଏହାପୂର୍ବରୁ ଭାରତ ୨୦୨୯ ରେ ଆୟୋଜିତ ହେବାକୁ ଥିବା ଯୁବ ଅଲିମ୍ପିକ୍ସ ଆୟୋଜନ କରିବାକୁ ଆଗ୍ରହୀ।
ମୋର ବିଶ୍ୱାସ ଅଛି ଭାରତ ଆଇଓସିର ନିରନ୍ତର ସମର୍ଥନ ପାଇବ। ଭାରତ ଏକ ବୃହତ ସ୍ତରରେ ବିଶ୍ୱସ୍ତରୀୟ କାର୍ଯ୍ୟକ୍ରମ ଆୟୋଜନ କରିବାକୁ ପ୍ରସ୍ତୁତ। ଜି-୨୦ ର ଆୟୋଜନ ସମୟରେ ବିଶ୍ୱ ଏହା ଦେଖିଛି। ଭାରତରେ ଅନ୍ତର୍ଜାତୀୟ ଅଲିମ୍ପିକ କମିଟିର ୧୪୧ ତମ ଅଧିବେଶନ ହେବା ଅତ୍ୟନ୍ତ ସ୍ବତନ୍ତ୍ର। ୪୦ବର୍ଷ ପରେ ଭାରତରେ ଆଓସି ଅଧିବେଶନ ଆୟୋଜନ କରିବା ଆମ ପାଇଁ ଗର୍ବର ବିଷୟ ।
ସେ କହିଛନ୍ତି, ବର୍ଷ ବର୍ଷ ଧରି ଭାରତ ସମସ୍ତ ପ୍ରକାରର ବିଶ୍ୱ କ୍ରୀଡା ଟୁର୍ନାମେଣ୍ଟ ଆୟୋଜନ କରିବାର କ୍ଷମତା ପ୍ରମାଣ କରିଛି। ଆମେ ନିକଟରେ ଚେସ ଅଲିମ୍ପିଆଡ ଆୟୋଜନ କରିଥିଲୁ ଯେଉଁଥିରେ ବିଶ୍ୱର ୧୮୬ ଟି ଦେଶ ଅଂଶଗ୍ରହଣ କରିଥିଲେ। ଆମେ ମହିଳା ଫୁଟବଲ ଅଣ୍ଡର -୧୭ ବିଶ୍ୱକପ, ପୁରୁଷ ହକି ବିଶ୍ୱକପ, ଶୁଟିଂ ବିଶ୍ୱକପ ମଧ୍ୟ ଆୟୋଜନ କରିଥିଲୁ ।
ବିଶ୍ୱର ସବୁଠୁ ବଡ କ୍ରିକେଟ ଲିଗ (ଆଇପିଏଲ) ମଧ୍ୟ ପ୍ରତିବର୍ଷ ଭାରତରେ ଆୟୋଜିତ ହୋଇଥାଏ। ବର୍ତ୍ତମାନ ଭାରତରେ କ୍ରିକେଟ ବିଶ୍ୱକପ ମଧ୍ୟ ଚାଲିଛି। ଏହି ଉତ୍ସାହର ବାତାବରଣରେ, ସମସ୍ତେ ମଧ୍ୟ ଖୁସି ଆଇଓସି କାର୍ଯ୍ୟନିର୍ବାହୀ ବୋର୍ଡ ୨୦୨୮ ଅଲିମ୍ପିକ୍ସରେ କ୍ରିକେଟ ଅନ୍ତର୍ଭୁକ୍ତ କରିବାକୁ ପ୍ରସ୍ତାବ ଦେଇଛି । ଆମେ ଶୀଘ୍ର ଏ ବିଷୟରେ ସକାରାତ୍ମକ ଖବର ଶୁଣିବାକୁ ଆଶା କରୁଛୁ।
ଅହମଦାବାଦରେ ଚାଲିଥିବା ବିଶ୍ୱକପରେ ପାକିସ୍ତାନ ଉପରେ ଭାରତର ବିଜୟ ସମ୍ପର୍କରେ ସେ କହିଛନ୍ତି କିଛି ମିନିଟ ପୂର୍ବରୁ ମଧ୍ୟ ଅହମଦାବାଦର ବିଶ୍ୱର ସର୍ବବୃହତ ଷ୍ଟାଡିୟମରେ ଭାରତ ଏକ ଚମତ୍କାର ବିଜୟ ପଞ୍ଜିକରଣ କରିଛି। ଏହି ଐତିହାସିକ ବିଜୟ ପାଇଁ ମୁଁ ଟିମ ଇଣ୍ଡିଆ ଏବଂ ସମସ୍ତ ଭାରତୀୟଙ୍କୁ ଅଭିନନ୍ଦନ ଜଣାଉଛି।
ଭାରତର ପ୍ରାଚୀନ କ୍ରୀଡା ପରମ୍ପରା ବିଷୟରେ ସେ କହିଛନ୍ତି, ଭାରତରେ ଖେଳ ଆମ ସଂସ୍କୃତି ଏବଂ ଆମର ଜୀବନଶୈଳୀର ଏକ ଗୁରୁତ୍ୱପୂର୍ଣ୍ଣ ଅଂଶ ଅଟେ। ଆମର ପ୍ରତ୍ୟେକ ଉତ୍ସବ ଭାରତର ଗ୍ରାମଗୁଡିକରେ କ୍ରୀଡା ବିନା ଅସମ୍ପୂର୍ଣ୍ଣ । ଆମେ ଭାରତୀୟମାନେ କେବଳ କ୍ରୀଡାପ୍ରେମୀ ନୁହଁ ବରଂ ଆମେ ସେହି ଲୋକ ଯେଉଁମାନେ କ୍ରୀଡାରେ ବଞ୍ଚନ୍ତି ଏବଂ ଏହା ଦ୍ୱାରା ଆମର ହଜାର ହଜାର ବର୍ଷର ଇତିହାସରେ ପ୍ରତିଫଳିତ ହୋଇଥାଏ।
