ବ୍ରିସବେନ୍,୧୪।୧: ସିଡନୀ ଟେଷ୍ଟରେ ଭାରତକୁ ପରାଜୟରୁ ରକ୍ଷା କରିଥିବା ହନୁମା ବିହାରୀ ଭାଜପା ଏମ୍ପି ତଥା ବଲିଉଡ୍ର ପ୍ରସିଦ୍ଧ ଗାୟକ ବାବୁଲ ସୁପ୍ରିଓଙ୍କୁ କଡା ଜବାବ ଦେଇଛନ୍ତି। ପୂର୍ବତନ ଭାରତୀୟ ବିସ୍ଫୋରକ ବ୍ୟାଟ୍ସମ୍ୟାନ ବୀରେନ୍ଦ୍ର ସେହ୍ବାଗ ମଧ୍ୟ ଏହାର ମଜା ନେଇଥିଲେ। ସିଡନୀ ଟେଷ୍ଟ ସମୟରେ ସୁପ୍ରିଓ ଟୁଇଟ୍ କରି ବିହାରୀଙ୍କ ବ୍ୟାଟିଂକୁ କଡ଼ା ସମାଲୋଚନା କରିଥିଲେ। ବିହାରୀ ୧୬୧ ବଲରୁ ୨୩ ରନ ସଂଗ୍ରହ କରିଥିଲେ। ସୁପ୍ରିଓ ତାଙ୍କୁ କ୍ରିକେଟର ହତ୍ୟାକାରୀ ବୋଲି କହିଥିଲେ। ସୁପ୍ରିୟୋ ନିଜ ଟୁଇଟ୍ରେ ହନୁମା ବିହାରୀଙ୍କ ନାମ ଭୁଲ୍ ଲେଖିଥିବାରୁ ତାଙ୍କ ଭୁଲକୁ ସୁଧାରି ହନୁମା ନିଜ ନାମ ଲେଖି ଟୁଇଟ୍ କରିଥିଲେ। ଏହା ଉପରେ ସେହ୍ବାଗ ହନୁମା ବିହାରୀଙ୍କ ମନ୍ତବ୍ୟର ଏକ ସ୍କ୍ରିନସଟ ଶେୟାର କରି କହିଥିଲେ ଯେ ବିହାରୀ ସମସ୍ତଙ୍କ ଉପରେ ଭାରୀ।
