ମେଲବୋର୍ନ,୨୯।୧୨: ବର୍ଡର-ଗାଭାସ୍କର ଟ୍ରଫିର ଦ୍ୱିତୀୟ ମ୍ୟାଚ୍ରେ ଭାରତୀୟ ଦଳ ୮ ଉଇକେଟ୍ରେ ଅଷ୍ଟ୍ରେଲିଆକୁ ପରାସ୍ତ କରିଛି। ଫଳରେ ସିରିଜ୍ ୧-୧ ବରାବର ରହିଛି। ବିରାଟ କୋହଲିଙ୍କ ଅନୁପସ୍ଥିତିରେ ନେତୃତ୍ୱ ନେଉଥିବା ଅଜିଙ୍କେ ରାହାନେ ପୂରା ମ୍ୟାଚରେ ଚମତ୍କାର ଅଧିନାୟକ ଦାୟିତ୍ୱ ତୁଲାଇ ଥିଲେ। ରାହାନେଙ୍କୁ ପ୍ରଶଂସାରେ ପୋତି ପକାଇଛନ୍ତି ମାଷ୍ଟରବ୍ଲାଷ୍ଟର ସଚିନ ତେନ୍ଦୁଲକର ଏବଂ ନିୟମିତ ଅଧିନାୟକ ବିରାଟ କୋହଲି। ସଚିନ କହିଛନ୍ତି, ବିରାଟ କୋହଲି, ରୋହିତ୍ ଶର୍ମା, ଈଶାନ୍ତ ଶର୍ମା ଓ ମହମ୍ମଦ ଶାମିଙ୍କ ବିନା ବିଜୟ ହାସଲ କରିବା ବହୁତ ବଡ ଉପଲବ୍ଧି। ପ୍ରଥମ ଟେଷ୍ଟରେ ମିଳିଥିବା ପରାଜୟକୁ ପଛରେ ପକାଇ ଟିମ ସିରିଜ ବରାବର କରିବା ପାଇଁ ଯେଉଁ ଆଗ୍ରହ ଦେଖାଇଛି, ତାହା ଅତ୍ୟନ୍ତ ପ୍ରଶଂସନୀୟ। ସେହିପରି କୋହଲି ଟୁଇଟ କରି କହିଛନ୍ତି, ଏହା ଏକ ଚମତ୍କାର ବିଜୟ। ପୂରା ଟିମ ବହୁତ ବଢିଆ ପ୍ରଦର୍ଶନ କରିଛନ୍ତି। ସାଥୀ ଖେଳାଳି ଖାସ କରି ରାହାନେଙ୍କ ପାଇଁ ଏହାଠାରୁ ଅଧିକ ଖୁସି ହୋଇପାରିବ ନାହିଁ, ଯିଏ ବିଜୟରେ ଟିମର ଜବରଦସ୍ତ ନେତୃତ୍ୱ ନେଇଛନ୍ତି। ସୂଚନାଯୋଗ୍ୟ, ପ୍ରଥମ ଟେଷ୍ଟ ଖେଳି କୋହଲି ଭାରତକୁ ଫେରିଥିଲେ। ଆଗାମୀ ଜାନୁୟାରୀ କୋହଲିଙ୍କ ସ୍ତ୍ରୀ ତଥା ଅଭିନେତ୍ରୀ ଅନୁଷ୍କା ଶର୍ମା ପ୍ରଥମ ସନ୍ତାନ ଜନ୍ମ ଦେବାକୁ ଯାଉଛନ୍ତି। ତାଙ୍କୁ ସମୟ ଦେବା ପାଇଁ କୋହଲି ପିତୃତ୍ୱ ଛୁଟି ନେଇ ଭାରତ ଫେରିଆସିଥିଲେ।
