ମୁମ୍ବାଇ,୭ ।୨: ପୁଣିଥରେ ମାନବିକତାର ପରିଚୟ ଦେଇଛି ଭାରତ । କରୋନା ମହାମାରୀକୁ ନେଇ ସାରା ବିଶ୍ୱର ମେରୁଦଣ୍ଡ ଦୋହଲି ଯାଇଥିବା ବେଳେ ଏବେବି ମାନବିକତାର ପରିଚୟ ଦେଇ ଆଫଗାନିସ୍ତାନକୁ କରୋନା ଟିକା ଦେଇଛି ଭାରତ । ରବିବାର ମୁମ୍ବାଇ-ଦିଲ୍ଲୀ-କାବୁଲ ଏୟାର ଇଣ୍ଡିଆ ବିମାନ ଯୋଗେ ଭାରତରୁ କରୋନା ଭ୍ୟାକ୍ସିନ ଆଫଗାନିସ୍ତାନ ପଠାଯାଇଛି । ଗତ ମାସରେ ବି ୫ ଲକ୍ଷ ଡୋଜ କରୋନା ଭ୍ୟାକ୍ସିନ ଭାରତଠାରୁ ଆଫଗାନିସ୍ତାନ ଗ୍ରହଣ କରିଥିଲା । କରୋନାକୁ ଦୂର କରିବା ପାଇଁ ଭାରତରେ ପ୍ରସ୍ତୁତ ୨ଟି ଭ୍ୟାକ୍ସିନକୁ ଜରୁରୀ ପରିସ୍ଥିତିରେ ବ୍ୟବହାର କରିବାକୁ ମଞ୍ଜୁରୀ ମିଳିବା ପରେ ପ୍ରଥମେ ଏହା ଦେଶରେ ସ୍ୱାସ୍ଥ୍ୟକର୍ମୀଙ୍କୁ ଦିଆଯାଇଛି । ଏହାପରେ ଭାରତ ବନ୍ଧୁତ୍ୱ ସୂତ୍ରରେ ଭୁଟାନ, ମାଲଦିଭିସ, ନେପାଳ, ମ୍ୟାନମାର ଓ ବାଂଲାଦେଶକୁ ବି କିଛି କିଛି ଭ୍ୟାକ୍ସିନ ଯୋଗାଇ ଦେଇଛି । ଏହାସହ ଭାରତରେ ପ୍ରାୟ ଆଉ ୫-୬ଟି ଭ୍ୟାକ୍ସିନ ପ୍ରସ୍ତୁତି କାମ ଚାଲିଛି । ସୂଚନାଯୋଗ୍ୟ, ଚାଇନାର ଉହାନ ସହରରୁ ପ୍ରଥମେ କରୋନା ମହାମାରୀ ଆରମ୍ଭ ହେବା ପରେ ଏହା ସାରା ବିଶ୍ୱକୁ ବ୍ୟାପି ଯାଇଥିଲା । ଏହାର କବଳରେ ଏବେବି ଆମେରିକା ଭଳି ବିକାଶଶୀଳ ଦେଶର ମେରୁଦଣ୍ଡ ଏକ ପ୍ରକାର ଦୋହଲି ଯାଇଛି କହିଲେ ଚଳେ ।
