ଭୁବନେଶ୍ୱର,୨୭।୧୧(କ୍ରୀଡ଼ା ପ୍ରତିନିଧି): କଳିଙ୍ଗ ଷ୍ଟାଡିୟମରେ ଚାଲିଥିବା ଏଫ୍ଆଇଏଚ୍ ହକି ପୁରୁଷ ଜୁନିୟର ବିଶ୍ୱକପ୍ର କ୍ବାର୍ଟର ଫାଇନାଲରେ ଭାରତ ପ୍ରବେଶ କରିଛି। ପୁଲ୍ ‘ବି’ର ଶନିବାର ଅନୁଷ୍ଠିତ ଶେଷ ଲିଗ୍ ମ୍ୟାଚରେ ଭାରତ ୮-୨ ଗୋଲରେ ପୋଲାଣ୍ଡକୁ ହରାଇ ଦେଇଛି। ପୁଲ୍ ‘ବି’ରେ ଭାରତ ୬ ପଏଣ୍ଟ ସହିତ ଦ୍ୱିତୀୟ ସ୍ଥାନରେ ରହିଛି। ୩ଟି ମ୍ୟାଚ ଖେଳି ୨ଟିରେ ବିଜୟ ହୋଇଥିବାବେଳେ ଗୋଟିଏ ମ୍ୟାଚରେ ପରାଜିତ ହୋଇଛି। ଏହି ପୁଲ୍ରୁ ଫ୍ରାନ୍ସ ଅପରାଜେୟ ରହି ୩ ବିଜୟ ସହ ୯ ପଏଣ୍ଟ ପାଇଛି। ଫଳରେ ଦଳ ଶୀର୍ଷ ସ୍ଥାନରେ ରହି ନକ୍ଆଉଟରେ ପ୍ରବେଶ କରିଛି। ଡିସେମ୍ବର ୧ରେ ହେବାକୁଥିବା କ୍ବାର୍ଟର ଫାଇନାଲରେ ଭାରତ ଗ୍ରୁପ୍ ‘ଏ’ରେ ପ୍ରଥମ ସ୍ଥାନ ହାସଲ କରିଥିବା ବେଲ୍ଜିୟମକୁ ଭେଟିବ। ୨୦୧୬ରେ ଲକ୍ଷ୍ନୌରେ ହୋଇଥିବା ଗତ ସଂସ୍କରଣରେ ଭାରତ ଓ ବେଲ୍ଜିୟମ ଫାଇନାଲ ହୋଇଥିଲା। ଏଥିରେ ବେଲ୍ଜିୟମକୁ ୨-୧ ଗୋଲରେ ହରାଇ ଭାରତ ଚାମ୍ପିୟନ ହୋଇଥିଲା। ତେଣୁ ଏଥର କ୍ବାର୍ଟର ଫାଇନାଲ ଗତ ଫାଇନାଲର ରିମ୍ୟାଚ ସଦୃଶ ହେବ।
ଅନ୍ୟ ଏକ କ୍ବାର୍ଟର ଫାଇନାଲରେ ପୁଲ୍ ‘ବି’ରେ ପ୍ରଥମ ସ୍ଥାନ ଦଳ ଫ୍ରାନ୍ସ ପୁଲ୍ ‘ଏ’ର ଦ୍ୱିତୀୟ ଦଳ ମାଲେସିଆକୁ ଭେଟିବ। ପୋଲାଣ୍ଡ ବିପକ୍ଷ ମ୍ୟାଚରେ ଭାରତ ପକ୍ଷରୁ ଓଡ଼ିଶାର ସୁଦୀପ ଚିରମାକୋ, ସଞ୍ଜୟ ଏବଂ ଅରଜିତ ସିଂ ହୁଣ୍ଡାଲ ୨ଟି ଲେଖାଏ ଏବଂ ଚମତ୍କାର ଫର୍ମରେ ଥିବା ଉତ୍ତମ ସିଂ, ସର୍ଦ୍ଦାନନ୍ଦ ତିୱାରୀ ଗୋଟିଏ ଲେଖାଏ ଗୋଲ ଦେଇଥିଲେ। ମ୍ୟାଚ ଆରମ୍ଭରେ ରାଜ୍ୟ ମୁଖ୍ୟ ସୂଚନା କମିଶନର ଜଳଦ କୁମାର ତ୍ରିପାଠୀ ଏବଂ ଭାରତୀୟ ବ୍ୟାଡ୍ମିଣ୍ଟନ ଦଳର ମୁଖ୍ୟ କୋଚ୍ ପଦ୍ମଭୂଷଣ ପୁଲେଲା ଗୋପୀଚାନ୍ଦ ଏବଂ ଶେଷରେ ଓଡ଼ିଶାର ପ୍ରମୁଖ ମହାଲେଖାକାର (ଅଡିଟ) ବିଭୁଦତ୍ତ ବସନ୍ତିଆ ଅତିଥିଭାବେ ଯୋଗ ଦେଇଥିଲେ। ଓଡ଼ିଶାର ସୁଦୀପ ପ୍ଲେୟର ଅଫ୍ ଦି ମ୍ୟାଚ ପୁରସ୍କାର ପାଇଥିଲେ।
