ଦିଗପହଣ୍ଡି, ୯।୫(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଅନ୍ତର୍ଗତ ବମକୋଇ ଗ୍ରାମର ଆରାଧ୍ୟ ଦେବୀ ମା’ ବାମଦେଇ ଠାକୁରାଣୀଙ୍କ ପ୍ରସିଦ୍ଧ ଯାତ୍ରା ମହୋତ୍ସବ ଏବେ ଶୀର୍ଷରେ। ଶନିବାର ଯାତ୍ରାର ଦ୍ୱିତୀୟ ଦିନରେ ମା’ଙ୍କ ଦର୍ଶନ ପାଇଁ ଯାତ୍ରାପୀଠରେ ଶ୍ରଦ୍ଧାଳୁଙ୍କ ଅସମ୍ଭାଳ ଭିଡ଼ ଦେଖିବାକୁ ମିଳିଛି।
ଯାତ୍ରାର ଦ୍ୱିତୀୟ ଦିନରେ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ବମକୋଇ ଗ୍ରାମର ଗର୍ବ ତଥା ବିଶିଷ୍ଟ ପ୍ରହଲ୍ଲାଦ ନୃତ୍ୟଗୁରୁ ପଦ୍ମଶ୍ରୀ ସିମାଞ୍ଚଳ ପାତ୍ରଙ୍କୁ ସମ୍ବର୍ଦ୍ଧିତ କରାଯାଇଛି। ବାହାଡାଗୁଡ଼ା ଏବଂ ସାହସପୁର ଗ୍ରାମର କଳାକାରଙ୍କ ଦ୍ୱାରା ପୌରାଣିକ ପ୍ରହଲ୍ଲାଦ ନାଟକ ପରିବେଷଣ ପୂର୍ବରୁ ଯାତ୍ରା କମିଟି ସଭାପତି ନରସିଂହ ପ୍ରଧାନ ଓ ଅନ୍ୟ କର୍ମକର୍ତ୍ତାମାନେ ଶ୍ରୀ ପାତ୍ରଙ୍କୁ ଅଙ୍ଗବସ୍ତ୍ର ଓ ମାଲ୍ୟାର୍ପଣ କରି ସମ୍ମାନିତ କରିଥିଲେ। ଏହି ଅବସରରେ ଗ୍ରାମର ବହୁ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।
ସକାଳୁ ଅସ୍ଥାୟୀ ଯାତ୍ରାପୀଠରେ ମା’ଙ୍କ ସେବା ପୂୂଜା ଓ ମଣୋହି ନୀତି ସମ୍ପନ୍ନ ହୋଇଥିଲା। ସନ୍ଧ୍ୟା ସମୟରେ ମୁଖ୍ୟ ସେବାୟତଙ୍କ ଦ୍ୱାରା ମା’ଙ୍କ ସା ଆଳତି ପରେ ଘଟ ଶୋଭାଯାତ୍ରା ପାଇଁ ଆଜ୍ଞାମାଳ ପ୍ରଦାନ କରାଯାଇଥିଲା। ମା’ଙ୍କ ହୁକୁମ ପାଇବା ପରେ ପାର୍ଶ୍ୱ ଘଟଧାରୀ ମହିଳାମାନେ ମସ୍ତକରେ ଘଟ ଉଠାଇଥିଲେ।
ବାଦ୍ୟ ବାଜଣା, ଶଙ୍ଖ ଧ୍ୱନି, ପାଇକ ଆଖଡ଼ା ଓ ମା’ ଠାକୁରାଣୀ ନୃତ୍ୟର ତାଳେ ତାଳେ ମୁଖ୍ୟ ଘଟଙ୍କ ସହ ଏହି ଭବ୍ୟ ଶୋଭାଯାତ୍ରା ଗ୍ରାମର ବିଭିନ୍ନ ସାହି ପରିକ୍ରମା କରିଥିଲା। ପାରମ୍ପରିକ ବେଶଭୂଷା ଓ ଝୁଲି ଝୁଲି ଯାଉଥିବା ଘଟଙ୍କୁ ଦେଖିବା ପାଇଁ ରାସ୍ତାର ଉଭୟ ପାର୍ଶ୍ୱରେ ଶ୍ରଦ୍ଧାଳୁଙ୍କ ଗହଳି ଲାଗିଥିଲା।
ଯାତ୍ରା କମିଟିର ସଦସ୍ୟ, ସ୍ବେଚ୍ଛାସେବୀ ଏବଂ ପୋଲିସ ବାହିନୀ ସମନୱୟ ରକ୍ଷା କରି ଭିଡ଼ ନିୟନ୍ତ୍ରଣ କରିବା ସହ ଶାନ୍ତିଶୃଙ୍ଖଳାର ସହ ଯାତ୍ରା ପରିଚାଳନା କରୁଛନ୍ତି। ଗ୍ରାମବାସୀଙ୍କ ସହଯୋଗରେ ମା’ଙ୍କ ଏହି ବାର୍ଷିକ ଯାତ୍ରା ବେଶ ଉତ୍ସାହର ସହ ପାଳିତ ହେଉଛି।
