୧୧ ଜିଲାରେ ଟିକାକରଣ ବନ୍ଦ
ଭୁବନେଶ୍ୱର, ୧୪।୪(ବ୍ୟୁରୋ): ରାଜ୍ୟରେ ଗୋଟିଏ ପଟେ କରୋନା ସଂକ୍ରମଣ ହୁ ହୁ ହୋଇ ବଢ଼ି ଚାଲୁଥିବା ବେଳେ ଟିକା ଅଭାବ ଚିନ୍ତା ବଢ଼ାଇଦେଲାଣି। ଟିକା ଅଭାବରୁ ଏବେ ୧୧ଟି ଜିଲାରେ ଟିକାକରଣ ସମ୍ପୂର୍ଣ୍ଣ ବନ୍ଦ କରାଯାଇଥିବା ପରିବାର କଲ୍ୟାଣ ନିର୍ଦ୍ଦେଶକ ଡା. ବିଜୟ ପାଣିଗ୍ରାହୀ ସୂଚନା ଦେଇଛନ୍ତି। ସେ କହିଛନ୍ତି, ମଙ୍ଗଳବାର ୫୦୦ ସେଣ୍ଟରରେ ଟିକାକରଣ ଚାଲିଛି। ଟିକା ଅଭାବରୁ ୧୧ଟି ଜିଲାରେ ଟିକାକରଣକୁ ସମ୍ପୂର୍ଣ୍ଣ ବନ୍ଦ କରାଯାଇଛି। ଯାଜପୁର, ଭଦ୍ରକ, ପୁରୀ, ନୟାଗଡ, ସୋନପୁର, ଗଜପତି ବୌଦ୍ଧ, ଝାରୁସୁଗୁଡା, ସମ୍ବଲପୁର, ଢେଙ୍କାନାଳ, କୋରାପୁଟ ଭଳି ଜିଲାରେ ଟିକାକରଣ ହୋଇପାରୁ ନାହିଁ। କମ୍ ଟିକା ଆସୁଥିବାରୁ ଏଭଳି ପରିସ୍ଥିତି ସୃଷ୍ଟି ହୋଇଛି। ଟିକା ଦେବା ପାଇଁ ସୋମବାର ପୁଣି ଚିଠି ଲେଖାଯାଇଛି। ବର୍ତ୍ତମାନ ରାଜ୍ୟରେ ୬୧ ହଜାର କୋଭାକ୍ସିନ ଓ ୩ଲକ୍ଷରୁ ଅଧିକ କୋଭିଶିଲ୍ଡ ଅଛି। ମଙ୍ଗଳବାର ୨ଲକ୍ଷ କୋଭିଶିଲ୍ଡ ଟିକା ଆସିଥିବା ପରିବାର କଲ୍ୟାଣ ନିର୍ଦ୍ଦେଶକ କହିଛନ୍ତି।
ମେ’ରେ ଶୀର୍ଷକୁ ଛୁଇଁପାରେ କରୋନା
ଭୁବନେଶ୍ୱର, ୧୪।୪(ବ୍ୟୁରୋ): ରାଜ୍ୟରେ ବେକାବୁ ହେଲାଣି କରୋନା। ପ୍ରତିଦିନ ନୂଆ ନୂଆ ରେକର୍ଡ କରିବାରେ ଲାଗିଛି ଏହି ମହାମାରୀ। ଗତ ୨୪ଘଣ୍ଟାରେ ରାଜ୍ୟରେ ୩୦ଜିଲାରୁ ୧,୭୮୪ ନୂଆ ପଜିଟିଭ୍ ଚିହ୍ନଟ ହୋଇଥିବାବେଳେ କେବଳ ଏପ୍ରିଲରେ ପଜିଟିଭ୍ ସଂଖ୍ୟା ୧୦ହଜାର ଟପିଲାଣି। ଆଗାମୀ କିଛି ମାସରେ ଦୈନିକ ସଂକ୍ରମଣ ରାଜ୍ୟରେ ୧୦ ହଜାରକୁ ପହଞ୍ଚତ୍ପାରେ ବୋଲି ଭୁବନେଶ୍ୱର ଏମ୍ସର ପୂର୍ବତନ ନିର୍ଦ୍ଦେଶକ ଡା. ଅଶୋକ ମହାପାତ୍ର ଆକଳନ କରିଛନ୍ତି। ସେହିପରି କରୋନା ଦ୍ୱିତୀୟ ଲହରର ଶୀର୍ଷ ବା ପିକ୍ ଆସନ୍ତା ମେ’ ମାସରେ ହୋଇପାରେ ବୋଲି ସ୍ବାସ୍ଥ୍ୟ ବିଶେଷଜ୍ଞ ମତ ଦେଇଛନ୍ତି। ଏଥିପାଇଁ ସମସ୍ତେ ସଚେତନ ରହିବାକୁ ପରାମର୍ଶ ଦେଇଛନ୍ତି। ସେହିପରି କରୋନାର ଏହି ଷ୍ଟ୍ରେନ୍ ରୂପ ବଦଳାଉଛି। ଦ୍ୱିତୀୟ ଲହରରେ ଆଖି ଲାଲ୍ ହେବା, ପେଟ ଦରଜ, ବାନ୍ତି, ଭୋକ ନ ଲାଗିବା ଭଳି ନୂଆ ଲକ୍ଷଣ ଦେଖାଯାଉଥିବା ଜଣାପଡ଼ିଛି। ଏଥିସହ ଗଳା ଖରାପ ହେବା ସହ ଡାଇରିଆ ପରି ଲକ୍ଷଣ ଦେଖାଦେଉଛି। କରୋନାର ପ୍ରଥମ ଲହର ସଂକ୍ରମଣ ସମୟରେ କାଶ, କଫ, ଜ୍ୱର ହେବା ସହ ଦେହ ଦରଜ, ନିମୋନିଆ ପରି ଲକ୍ଷଣ ଦେଖାଦେଉଥିଲା। ଏହାପରେ ବିଭିନ୍ନ ଅଙ୍ଗ କ୍ରମଶଃ ଅଚଳ ହୋଇଯାଉଥିଲା। ଏବେ ମଧ୍ୟ କରୋନା ସଂକ୍ରମଣ ହେଲେ ନିମୋନିଆ ହେବାର ସମ୍ଭାବନା ଅଧିକ ରହିଛି। ଏଥିସହ ଆଖି ଲାଲ, ପେଟ ଦରଜ, ଭୋକ ନ ଲାଗିବା, ଖାଦ୍ୟ ସ୍ବାଦ ବାରି ନ ହେବା, ବାନ୍ତି ଲାଗିବା, ଡାଇରିଆ ହେବା ପରି ଲକ୍ଷଣ ଦେଖାଦେଲେ କରୋନା ଟେଷ୍ଟ କରାଇ ନେବାକୁ ଡାକ୍ତର ଅଶୋକ ମହାପାତ୍ର ପରାମର୍ଶ ଦେଇଛନ୍ତି। ଓଡ଼ିଶାରେ କରୋନା ଆକ୍ରାନ୍ତଙ୍କ ସଂଖ୍ୟା ନିୟନ୍ତ୍ରଣରେ ରହିଛି। ହେଲେ ଛତିଶଗଡ଼ ପରିସ୍ଥିତିକୁ ଦେଖିଲେ ଅଧିକ ସଜାଗ ହେବାକୁ ହେବ ପଡ଼ିବ ବୋଲି ମହାପାତ୍ର କହିଛନ୍ତି।
ସେପଟେ ପୁଣି ଚିନ୍ତା ବଢ଼ାଇଲାଣି ନୂଆପଡ଼ା। ପଡ଼ୋଶୀ ରାଜ୍ୟ ଛତିଶଗଡ଼ ପାଇଁ ନୂଆପଡ଼ା ଜିଲାରେ ସ୍ଥିତି ସଙ୍ଗିନ ହେବାରେ ଲାଗିଛି। ରାଜ୍ୟରେ ଗତ ୨୪ଘଣ୍ଟା ମଧ୍ୟରେ ଚିହ୍ନଟ ହୋଇଥିବା ନୂଆ ଆକ୍ରାନ୍ତଙ୍କ ଭିତରେ ୧,୦୩୪ କ୍ୱାରାଣ୍ଟାଇନ ସେଣ୍ଟରର ଥିବା ବେଳେ ୭୪୯ ସ୍ଥାନୀୟ ଆକ୍ରାନ୍ତ ଅଛନ୍ତି। ତେବେ ଏଥିରେ ନୂଆପଡ଼ାରୁ ସର୍ବାଧିକ ୩୦୩ ଜଣ ରହିଛନ୍ତି। ସେହିପରି ନୂଆ ଆକ୍ରାନ୍ତଙ୍କ ମଧ୍ୟରେ ସୁନ୍ଦରଗଡ଼ରୁ ୨୪୧, ଖୋର୍ଦ୍ଧାରୁ ୨୦୧, ସମ୍ବଲପୁରରୁ ୧୧୪, ବଲାଙ୍ଗୀରରୁ ୯୧, ବରଗଡରୁ ୮୭, ଗଞ୍ଜାମରୁ ୮୦, ବାଲେଶ୍ୱରରୁ ୭୨, କଳାହାଣ୍ଡିରୁ ୬୮, ନବରଙ୍ଗପୁରରୁ ୬୭, କଟକରୁ ୫୯, କେନ୍ଦୁଝରରୁ ୫୪, ପୁରୀରୁ ୫୩ଜଣ ରହିଛନ୍ତି। ରାଜ୍ୟରେ ଏବେ ମୋଟ ସଂକ୍ରମିତ ସଂଖ୍ୟା ୩,୫୩,୦୮୬ରେ ପହଞ୍ଚତ୍ଛି। ପୂର୍ବରୁ ରାଜ୍ୟରେ ଖୋର୍ଦ୍ଧା, ସୁନ୍ଦରଗଡ଼ ରେଡ୍ ଜୋନ୍ରେ ଥିବା ବେଳେ କଳାହାଣ୍ଡି, ସମ୍ବଲପୁର ୟେଲୋ ଜୋନ୍ରେ ଥିଲା। ଏବେ ପୁଣି ଆଉ ଦୁଇଟି ଜିଲା ନୂଆପଡ଼ା ଓ ବରଗଡ଼ ୟେଲୋ ଜୋନ୍ରେ ସାମିଲ ହୋଇଛି।
