କୋରାପୁଟ,୩୦ା୧(ଅମିତାଭ ବେହେରା): ୨୦୨୩ ଜାନୁଆରୀରୁ ଗତ ୨୦୨୪ ଡିସେମ୍ବର ଯାଏ ୨ ବର୍ଷରେ କୋରାପୁଟ ଜିଲାରେ ସମୁଦାୟ ୭୫୩ଟି ସଡ଼କ ଦୁର୍ଘଟଣା ଘଟିଥିବାବେଳେ ଏଥିରେ ମୋଟ୍ ୪୭୪ ଜଣଙ୍କ ଜୀବନ ଯାଇଛି। ୪୪୦ ଗୁରୁତର ହୋଇଥିବା ନେଇ ସ୍ଥାନୀୟ ଦକ୍ଷତା ବୃଦ୍ଧି ତାଲିମ କେନ୍ଦ୍ର ପରିସରରେ ଆୟୋଜିତ ସଂସଦୀୟ କ୍ଷେତ୍ର ସଡ଼କ ସୁରକ୍ଷା କମିଟି ବୈଠକରେ ଜଣାଯାଇଛି।
ସେଥିମଧ୍ୟରୁ ୨୦୨୩ରେ ୩୬୩ଟି ସଡ଼କ ଦୁର୍ଘଟଣାରେ ୨୩୧ ଜଣଙ୍କ ମୃତ୍ୟୁ ହୋଇଥିବାବେଳେ ୧୮୪ ଜଣ ଗୁରୁତର ହୋଇଥିବାବେଳେ ଗତ ୨୦୨୪ରେ ୩୮୪ଟି ସଡ଼କ ଦୁର୍ଘଟଣାରେ ୨୪୩ ଜଣଙ୍କ ମୃତ୍ୟୁ ହୋଇଥିବାବେଳେ ୨୬୬ ଜଣ ଗୁରୁତର ହୋଇଥିଲେ। କୋରାପୁଟ ଏମ୍ପି ସପ୍ତଗିରି ଶଙ୍କର ଉଲ୍ଲାକାଙ୍କ ଅଧ୍ୟକ୍ଷତାରେ ଆୟୋଜିତ ବୈଠକରେ ଜିଲାପାଳ ଭିି. କୀର୍ତ୍ତି ଭାସନ, ଜୟପୁର ବିଧାୟକ ତାରାପ୍ରସାଦ ବାହିନୀପତି, ଲକ୍ଷ୍ମୀପୁର ବିଧାୟକ ପବିତ୍ର ସାଉଁନ୍ତା, ପଟ୍ଟାଙ୍ଗି ବିଧାୟକ ରାମଚନ୍ଦ୍ର କାଡାମ, ଜିଲା ପରିଷଦ ଅଧ୍ୟକ୍ଷା ସସ୍ମିତା ମେଲକା, କୋରାପୁଟ ବିଧାୟକଙ୍କ ପ୍ରତିନିଧି ସୁମନ୍ତ ପ୍ରଧାନ, କୋରାପୁଟ ଆଞ୍ଚଳିକ ପରିବହନ ଅଧିକାରୀ ରାଜେଶ ମାରାଣ୍ଡି, ଏଆର୍ଟିଓ ତପନ କୁମାର ବେଟି,ଏମ୍ଭିଆଇ ଚନ୍ଦ୍ରା ବିଶ୍ୱାସଙ୍କ ସମେତ ସମସ୍ତ କମିଟି ସଦସ୍ୟ ବୈଠକରେ ଉପସ୍ଥିତ ରହି ଦିନକୁ ଦିନ ଜିଲାରେ ସଡ଼କ ଦୁର୍ଘଟଣା ବୃଦ୍ଧି ପାଉଥିବାବେଳେ ସେହି ଅନୁସାରେ ଗୁରୁତର ଓ ମୃତୁସଂଖ୍ୟା ମଧ୍ୟ ବୃଦ୍ଧି ପାଉଥିବାରୁ ଏହାକୁ କିପରି ହ୍ରାସ କରାଯାଇପାରିବ ସେ ନେଇ ବିଭିନ୍ନ ସଚେତନତା କାର୍ଯ୍ୟ ଯଥା, ଗାଡ଼ି ଚଳାଇବାବେଳେ ହେଲମେଟ୍ ପିନ୍ଧିବା, ମୋବାଇଲରେ କଥା ନ ହେବା, ଟ୍ରାଫିକ ରୁଲ ମାନିବା, ଦ୍ରୁତ ଗତିରେ ଗାଡ଼ି ନ ଚଳାଇବା, ମଦ ପିଇ ଗାଡ଼ି ଚଳାଇବା ନାହଁି ଆଦି ଉପରେ ଲୋକଙ୍କୁ ଓ ଗାଡ଼ି ଚାଳକମାନଙ୍କୁ ସଚେତନତା କରିବା ଆଦି ଉପରେ ବୈଠକରେ ଗୁରୁତ୍ୱାରୋପ କରାଯାଇଥିଲା। କୋରାପୁଟ ଜିଲାରେ ପ୍ରତି ମାସରେ ସଡ଼କ ଦୁର୍ଘଟଣାରେ ହାରାହାରି ୨୦ରୁ ଊର୍ଦ୍ଧ୍ୱ ଜଣଙ୍କ ପ୍ରାଣ ହାନି ଘଟୁଥିବାବେଳେ ଏହାକୁ କିପରି ହ୍ରାସ କରାଯାଇପାରିବ ସେ ନେଇ ଏହି ସଡକ ସୁରକ୍ଷା କମିଟି ସଦସ୍ୟମାନେ ଗୁରୁତ୍ୱରୋପ କରିଥିଲୋ
ସୂଚନାଯୋଗ୍ୟ, କୋରାପୁଟ ଜିଲାର ବୋରିଗୁମ୍ମା ଥାନା ଅଞ୍ଚଳରେ ଗତ ଦୁଇ ବର୍ଷରେ ଜିଲାର ଜୟପୁର ସଦର ଥାନା ଅଞ୍ଚଳରେ ସଡ଼କ ଦୁର୍ଘଟଣାରେ ସର୍ବାଧିକ ୫୮ ଜଣଙ୍କର ମୃତ୍ୟୁ ହୋଇଥିବାବେଳେ ବୋରିଗୁମ୍ମା ଥାନା ଅଞ୍ଚଳରେ ଓ କୋଟପାଡ଼ ଥାନା ଅଞ୍ଚଳରେ ଦୁଇ ବର୍ଷରେ ୫୭ ଜଣ ଲେଖାଏ ମୃତ୍ୟୁ ହୋଇଥିବା ଜଣାଯାଇଛି। ସେହିପରି କୋଟିଆ ଥାନା ଅଞ୍ଚଳରେ ସର୍ବନିମ୍ନ ଜଣଙ୍କର ମୃତ୍ୟୁ ହୋଇଥିବା କୋରାପୁଟ ଆଞ୍ଚଳିକ ପରିବହନ ବିଭାଗ ପକ୍ଷରୁ କୁହାଯାଇଛି। ଏହି ବୈଠକ ଅବସରରେ ସଡ଼କ ଦୁର୍ଘଟଣାରେ ଗୁରୁତର ବ୍ୟକ୍ତିଙ୍କୁ ନିକଟ ହସ୍ପିଟାଲକୁ ପହଞ୍ଚାଇଥିବା ବୈପାରିଗୁଡ଼ା ବ୍ଲକ ଅଞ୍ଚଳର କୁମନା ମୁଦୁଲି ନାମକ ଜଣେ ମହିଳାଙ୍କୁ ଶ୍ରେଷ୍ଠ ସାମରିଟାନ ସମ୍ମାନ ଭାବେ ପ୍ରମାଣପତ୍ର ଓ ୨ ହଜାର ଟଙ୍କାର ଏକ ଚେକ ପ୍ରଦାନ କରାଯାଇ ସମ୍ମାନିତ କରାଯାଇଥିଲା। କୋରାପୁଟ ଏମ୍ପି ଏହି ପୁରସ୍କାର ପ୍ରଦାନ କରିଥିଲେ।
