ଢେଙ୍କାନାଳ ଅଫିସ, ୫।୩: ସାତକୋଶିଆ ବ୍ୟାଘ୍ର କରିଡରରେ ସାମିଲ କରାଯିବା ପରେ ପ୍ରାକୃତିକ ସୌନ୍ଦର୍ଯ୍ୟରେ ଭରପୂର ‘ନନ୍ଦିନିଆ’ ପର୍ଯ୍ୟଟନସ୍ଥଳୀ ମାନ୍ୟତାରୁ ବାଦ୍ ପଡ଼ିଛି। ବିବିଧ ବନ୍ୟଜୀବନରେ ଭରପୂର ଏହି ଜଙ୍ଗଲରେ ପର୍ଯ୍ୟଟକଙ୍କ ପ୍ରବେଶ ଉପରେ କଟକଣା ଜାରି କରାଯାଇଛି। ଫଲରେ ‘ନନ୍ଦିନିଆ’ରେ ପର୍ଯ୍ୟଟନକୁ ନେଇ ରହିଥିବା ସମସ୍ତ ସମ୍ଭାବନାରେ ଏକପ୍ରକାର ପୂର୍ଣ୍ଣଚ୍ଛେଦ ପଡ଼ିଛି। ଏହି ରିଜର୍ଭ ଫରେଷ୍ଟରେ କଲରାପତରିଆ ସଂଖ୍ୟା ବୃଦ୍ଧି ପ୍ରାଣୀପ୍ରେମୀଙ୍କ ମଧ୍ୟରେ ଖୁସିର ଲହରି ଖେଳାଇ ଦେଇଥିବାବେଳେ ଏହା ପର୍ଯ୍ୟଟନ ମାନଚିତ୍ରରୁ ବାଦ୍ ପଡ଼ିବା ଅନେକଙ୍କୁ ନିରାଶ କରିଛି। ଏହାକୁ ଇକୋ ଟୁରିଜମ ଭାବେ ବିକାଶ କରିବା ସହ ସଫାରି ପାଇଁ ପଦକ୍ଷେପ ନିଆଗଲେ ପ୍ରକୃତିପ୍ରେମୀମାନେ ଅତି ନିକଟରୁ ବାଘ, ହାତୀ ଭଳି ଜଙ୍ଗଲୀ ଜୀବଙ୍କୁ ଦେଖିବାର ସୁଯୋଗ ପାଇପାରନ୍ତେ ବୋଲି ସାଧାରଣରେ ମତ ପ୍ରକାଶ ପାଇଛି।
ଢେଙ୍କାନାଳ ବନଖଣ୍ଡର ହିନ୍ଦୋଳ ରେଞ୍ଜ ଅଧୀନ ନନ୍ଦିନିଆ ସଂରକ୍ଷିତ ଜଙ୍ଗଲ ପ୍ରକୃତିର ବରଦାନ। ଏଠାକାର ବିସ୍ତୀର୍ଣ୍ଣ ବନଭୂମି, ସବୁଜିମାମୟ ପରିବେଶ ପର୍ଯ୍ୟଟକଙ୍କୁ ବାନ୍ଧି ରଖିବା ଲାଗି ଯଥେଷ୍ଟ। ଜିଲାର କଲରାପତରିଆଙ୍କ ଅନ୍ୟତମ ଅନ୍ତୁଡ଼ିଶାଳ ତଥା ସାତକୋଶିଆ ସୀମାନ୍ତ ଏହି ଜଙ୍ଗଲକୁ ନିକଟରେ ବ୍ୟାଘ୍ର କରିଡରରେ ସାମିଲ କରାଯାଇଛି। ବାଘଙ୍କ ପ୍ରାକୃତିକ ଆବାସସ୍ଥଳୀରୁ ମଣିଷଙ୍କୁ ଦୂରେଇ ରଖିବା ଏବଂ ସେଠାରେ ମନୁଷ୍ୟକୃତ କାର୍ଯ୍ୟକଳାପ ଉପରେ ଅଙ୍କୁଶ ଲଗାଇବା ଲାଗି ନନ୍ଦିନିଆରେ ପର୍ଯ୍ୟଟକଙ୍କ ପ୍ରବେଶକୁ ବାରଣ କରାଯାଇଛି। ହେଲେ ବନ ବିଭାଗର ଏହି କଟକଣା ଏଠାକାର ପର୍ଯ୍ୟଟନ ଶିଳ୍ପକୁ ପ୍ରଭାବିତ କରିବା ଆଶଙ୍କା ସୃଷ୍ଟି ହୋଇଛି।
‘ନନ୍ଦିନିଆ’ ସଂରକ୍ଷିତ ଜଙ୍ଗଲରେ ଥିବା ପ୍ରାଚୀନ ଗୁମ୍ଫାରେ କେଉଁ ଆବହମାନ କାଳରୁ ଚତୁର୍ଦ୍ଧା ମୂର୍ତ୍ତି ପୂଜାପାଇ ଆସୁଛନ୍ତି। ସଂକ୍ରାନ୍ତି, ଅମାବାସ୍ୟାରେ ସ୍ଥାନୀୟ ଅଞ୍ଚଳବାସୀ ଏଠାରେ ସମବେତ ହୋଇ ସଂକୀର୍ତ୍ତନ କରିଥାଆନ୍ତି। ଏଠାରେ ଥିବା ବଡ଼ପଥର କୁଣ୍ଡରେ ବର୍ଷାଦିନେ ପାଣି ସଂରକ୍ଷିତ ହୋଇ ରୁହେ। ସେଠାରେ ଝରଣା ଭଳି ପାହାଡ଼ ତଳକୁ ପ୍ରବାହିତ ହୋଇଥାଏ। ସନାତନ ସଂସ୍କୃତିର ଭାବାବେଗ ସହିତ ଜଡ଼ିତ ଏହି ସ୍ଥାନ ଆଧ୍ୟାତ୍ମିକତା ଦୃଷ୍ଟିକୋଣରୁ ଗୁରୁତ୍ୱ ବହନ କରୁଥିବାବେଳେ ପର୍ଯ୍ୟଟନ ଋତୁରେ ଏଠାରେ ଅସମ୍ଭାଳ ଭିଡ଼ ହୋଇଥାଏ। ହେଲେ କଟକଣା ଲାଗୁ ପରେ ଏଠାରେ ଆଉ ବଣଭୋଜି ହୋଇପାରିବ ନାହିଁ, ଯାହା ପର୍ଯ୍ୟଟକଙ୍କୁ ନିରାଶ କରିଛି। ଅନ୍ୟପଟେ ନିକଟରେ ବ୍ୟାଘ୍ର କରିଡରରେ ସାମିଲ ହେବା ପରେ ଏହାକୁ ନିଷିଦ୍ଧାଞ୍ଚଳ ଭାବେ ଘୋଷଣା କରାଯାଇଛି। ସାଧାରଣ ଲୋକଙ୍କ ଅନଧିକାର ପ୍ରବେଶ ବନ୍ଦ କରିବା ଲାଗି ‘ନନ୍ଦିନିଆ’ର ପ୍ରବେଶ ପଥରେ ଏକ ଚେକ୍ଗେଟ୍ ଲଗାଯାଇଛି। ବନ କର୍ମଚାରୀ, ଏଲିଫ୍ୟାଣ୍ଟ ସ୍କ୍ବାଡ୍ କର୍ମଚାରୀ ଦିନରାତି ପାଟ୍ରୋଲିଂ କରୁଛନ୍ତି।
ଏ ସଂକ୍ରାନ୍ତରେ ଅଞ୍ଚଳର ଯୁବ ସାମାଜିକ କର୍ମୀ ସୁବାସ ଚନ୍ଦ୍ର ପାଳ କୁହନ୍ତି, ହିନ୍ଦୋଳ ଏନଏସିଠାରୁ ନନ୍ଦିନିଆର ଦୂରତା ମାତ୍ର ୪ କିଲୋମିଟର। ଏହାକୁ ପର୍ଯ୍ୟଟନସ୍ଥଳୀର ମାନ୍ୟତା ଦେବାକୁ ବାରମ୍ବାର ଦାବି କରାଯାଇଛି। ହେଲେ ଏହାକୁ ସାତକୋଶିଆ ବ୍ୟାଘ୍ର କରିଡରରେ ସାମିଲ କରାଯାଇଥିବା ବେଳେ ବନ ବିଭାଗ ପକ୍ଷରୁ ଜଙ୍ଗଲ ଭିତରକୁ କାହାରିକୁ ପ୍ରବେଶ କରାଇ ଦିଆଯାଉନାହିଁ। ଜିଲା ପର୍ଯ୍ୟଟନ ଅଧିକାରୀ ଜଗଦୀଶ ରାୟ କୁହନ୍ତି, ସଂରକ୍ଷିତ ଜଙ୍ଗଲର ମାନ୍ୟତା ପାଇଥିବାରୁ ‘ନନ୍ଦିନିଆ’ ପର୍ଯ୍ୟଟନ ସ୍ଥଳୀ ମାନ୍ୟତାରୁ ବଞ୍ଚତ୍ତ ହୋଇଛି। ଏଠାରେ ଇକୋ ଟୁରିଜ୍ମ ପାଇଁ ପ୍ରସ୍ତାବ ଦିଆଯିବା ଉଚିତ ବୋଲି ସେ କହିଛନ୍ତି।
