ଏବେ ବି ଭାରତରେ ବହୁ ଅଞ୍ଚଳରେ ଗମନାଗମନର ଅଭାବ ରହିଛି। ସ୍ବାସ୍ଥ୍ୟ ସେବା ସେଠାରେ ଅପହଞ୍ଚ। ରୋଗୀଟିଏ ହେଉ କିମ୍ବା ଗର୍ଭବତୀଙ୍କୁ ଖଟିଆରେ ବୁହାହୋଇ ଅଣାଯାଉଛି ହସ୍ପିଟାଲକୁ। ଆମ୍ବୁଲାନ୍ସ ସେବା ବି ଉପଲବ୍ଧ ହୋଇପାରୁ ନାହିଁ। ଏଭଳି ସ୍ଥିତି ପ୍ରତିଦିନ ଖବର ପାଲଟୁଥିବା ବେଳେ ୩ ଡାକ୍ତର ବନ୍ଧୁ ଆଇସିୟୁ ସେବାକୁ ଗ୍ରାମାଞ୍ଚଳରେ ପହଞ୍ଚାଇବା ଲାଗି ଆରମ୍ଭ କରିଛନ୍ତି ‘ମିଶନ ଆଇସିୟୁ’। ଏହି ମିଶନ ଚଳାଉଛନ୍ତି ଡା. ଅଶ୍ୱିନୀ ନାୟକ, ମନୋଜ ଶାହା ଏବଂ ଡା. ଏଡ୍ମଣ୍ଡ। ସେମାନେ ଗ୍ରାମାଞ୍ଚଳରେ ଆଇସିୟୁ ଯୋଗାଇଦେବା ସହ ଉନ୍ନତ ଚିକିତ୍ସା ବ୍ୟବସ୍ଥା କରୁଛନ୍ତି। ଏଣୁ ଦୂରଦୂରାନ୍ତରୁ ଗମ୍ଭୀର ସ୍ଥିତିରେ ଥିବା ରୋଗୀଙ୍କୁ ଆଉ ଦୂର ସହରକୁ ଆସିବାକୁ ପଡୁନାହିଁ। ସେମାନେ ଗ୍ରାମାଞ୍ଚଳରେ ଥିବା ବିଭିନ୍ନ ହସ୍ପିଟାଲରେ ଏହି ବ୍ୟବସ୍ଥା ଉପଲବ୍ଧ କରାଇ ପାରୁଛନ୍ତି। ସେଠାରେ ଅଭିଜ୍ଞ ଡାକ୍ତର, ମେଡିକାଲ କିଟ୍ ଆଦି ବି ଯୋଗାଇ ଦିଆଯାଉଛି। ଏବେ ସୁଦ୍ଧା ତିନି ଡାକ୍ତର ବନ୍ଧୁ ୨୦ଟି ହସ୍ପିଟାଲରେ ୨୦୦ ଆଇସିୟୁ ବେଡ୍ କିଟ୍ ଯୋଗାଇ ସାରିଲେଣି। ସେମାନେ ଏକ ହସ୍ପିଟାଲରେ ୧୦-୪୦ ବେଡ୍ ରଖିବାର ଯୋଜନା କରିଛନ୍ତି। ରୋଗୀଙ୍କୁ ଦୁର୍ଗମ ଅଞ୍ଚଳରୁ ଆଣି ସେଠାରେ ରଖୁଛନ୍ତି ଓ ବର୍ତ୍ତମାନ ଏହି ମିଶନ ମହାରାଷ୍ଟ୍ର, କର୍ନାଟକ, ଓଡ଼ିଶା, କଶ୍ମୀର, ମଣିପୁର, ତ୍ରିପୁରା ଏବଂ ଅରୁଣାଚଳ ପ୍ରଦେଶରେ ଚାଲୁରହିଛି। ଏହାପରେ ଜଣେ ରୋଗୀ ମହିଳାଙ୍କୁ ଯେପରି ଆଇସିୟୁ ପାଇବାକୁ ୩୦ ମିନିଟ୍ରୁ ଅଧିକ ବାଟ ଯାତ୍ରା କରିବାକୁ ପଡ଼ିବନି, ତାହାକୁ ଲକ୍ଷ୍ୟ ରଖି ଯୋଜନା ପ୍ରସ୍ତୁତ କରୁଛନ୍ତି।
