ମୃତକଙ୍କ ଦଶାହ କର୍ମରେ ହେଉଥିବା ଅଯଥା ଖର୍ଚ୍ଚ ରୋକିବା ପାଇଁ ବାରାଣସୀର ୱାଜିଦପୁରର ଲୋକମାନେ ଏକଜୁଟ ହୋଇଛନ୍ତି। ଗାଁରେ କାହାର ମୃତ୍ୟୁରେ ଦଶାହ କର୍ମ ନ କରି ଏ ବାବଦରେ ହେଉଥିବା ଖର୍ଚ୍ଚରେ ପିଲାମାନଙ୍କ ପାଠପଢ଼ା ହେବ ଓ ଏହି ଦିନ ଗାଁରେ ଚାରା ରୋପଣ କରାଯିବ ବୋଲି ହରହୁଆର ୱାଜିଦପୁର ଗ୍ରାମବାସୀ ନିଷ୍ପତ୍ତି ନେଇଛନ୍ତି। ଗାଁ ମୁଖିଆ ଲଲମାନ ଯାଦବ କହିଛନ୍ତି, କୌଣସି ବ୍ୟକ୍ତିଙ୍କ ମୃତ୍ୟୁ ପରେ ଦଶାହ କର୍ମ ପାଇଁ ତାଙ୍କ ପରିବାରକୁ ବହୁତ ଚିନ୍ତା କରିବାକୁ ପଡ଼ିଥାଏ। ଅନେକ ଗରିବ ପରିବାରକୁ ଏନେଇ ଋଣ ନେବାକୁ ପଡ଼ିଥାଏ। ଏଣିକି ଆଉ ଏଭଳି ସ୍ଥିତି ଉପୁଜିବ ନାହିଁ। ନିଷ୍ପତ୍ତି ଅନୁଯାୟୀ ଏକ କମିଟି ଗଠନ କରାଯିବ ଏବଂ ଦଶାହ କର୍ମରେ ହେବାକୁ ଥିବା ଖର୍ଚ୍ଚ ସମ୍ପୃକ୍ତ ପରିବାରର ସାଧ୍ୟ ଅନୁଯାୟୀ ଜମା କରାଯିବ। ଏହା ପରେ କମିଟି ନିଷ୍ପତ୍ତି ଅନୁସାରେ ସେହି ଟଙ୍କା ଗାଁର ଗରିବ ପିଲାଙ୍କ ଶିକ୍ଷା ପାଇଁ ଖର୍ଚ୍ଚ ହେବ। ଦଶାହ ଦିନ ପଞ୍ଚାୟତ ଭବନରେ କେବଳ ଶୋକସଭା ଅନୁଷ୍ଠିତ ହେବ। ଶୋକସଭା ବୈଠକ ପରେ ମୃତକଙ୍କ ପୁଅଙ୍କ ସଂଖ୍ୟା ଅନୁସାରେ ଚାରା ସର୍ବସାଧାରଣ ଜମିରେ କିମ୍ବା ମୃତ ବ୍ୟକ୍ତିଙ୍କ ଜମିରେ ଲଗାଯିବ। ମାତାପିତାଙ୍କ ମୃତ୍ୟୁପରେ ବୃକ୍ଷଗୁଡିକ ସେମାନଙ୍କର ପ୍ରତୀକ ଭାବରେ ସ୍ମରଣୀୟ ହେବେ। ବୃକ୍ଷଗୁଡିକର ସୁରକ୍ଷା ଦୟିତ୍ୱ ପୁଅମାନେ ତୁଲାଇବେ ଓ ଏହାଦ୍ୱାରା ପରିବେଶ ସଂରକ୍ଷଣ ହୋଇପାରିବ।
