ମୂଷା ମାରିଥିବା ବ୍ୟକ୍ତିଙ୍କ ବିରୋଧରେ ୩୦ ପୃଷ୍ଠାର ଚାର୍ଜଶିଟ୍ ଦାଖଲ ହେବା ଶୁଣି ଆଶ୍ଚର୍ଯ୍ୟ ଲାଗୁଥିଲେ ବି ସତ। ଏଭଳି ଘଟଣା ଘଟିଛି ଉତ୍ତରପ୍ରଦେଶର ବାଦାଉନରେ। ଏଠାରେ ମନୋଜ ନାମକ ଜଣେ ବ୍ୟକ୍ତି ମୂଷାକୁ ମାରିବା ମହଙ୍ଗା ପଡ଼ିଛି। ବର୍ତ୍ତମାନ ତାଙ୍କୁ ଏହି ମାମଲାରେ ପାଞ୍ଚ ବର୍ଷ ପର୍ଯ୍ୟନ୍ତ ଜେଲ ଦଣ୍ଡାଦେଶ ହୋଇପାରେ ବୋଲି କୁହାଯାଉଛି। ଏହି ଘଟଣାର ତଦନ୍ତ ପରେ ପୋଲିସ କୋର୍ଟରେ ୩୦ ପୃଷ୍ଠାର ଚାର୍ଜଶିଟ ଦାଖଲ କରିଛି। ପୋଷ୍ଟ ମର୍ଟମ ରିପୋର୍ଟ, ଗଣମାଧ୍ୟମରେ ପ୍ରକାଶିତ ଭିଡିଓ ଏବଂ ସମ୍ପୃକ୍ତ ବିଭିନ୍ନ ବିଭାଗର ବିଶେଷଜ୍ଞଙ୍କ ପରାମର୍ଶକୁ ଦୃଷ୍ଟିରେ ରଖି ଏହି ଚାର୍ଜଶିଟ ପ୍ରସ୍ତୁତ କରାଯାଇଛି। ସଂଗୃହୀତ ପ୍ରମାଣ ଆଧାରରେ ଅନୁସନ୍ଧାନକାରୀ ଅଧିକାରୀ ରାଜେଶ ଯାଦବ ଚାର୍ଜଶିଟରେ ଲେଖିଛନ୍ତି ଅଭିଯୁକ୍ତ ମନୋଜଙ୍କୁ ଧାରା ୧୧ (ପ୍ରିଭେନଶନ ଅଫ କ୍ରୁଏଲିଟି ଟୁ ଆନିମଲ୍ସ ଆକ୍ଟ) ଏବଂ ଧାରା ୨୯ (ପ୍ରାଣୀମାନଙ୍କୁ ହତ୍ୟା କିମ୍ବା ଅକ୍ଷମ କରିବା)ରେ ଅଭିଯୁକ୍ତ କରାଯାଇଛି।
ଏହି ମାମଲାରେ ପୋଲିସ ଅଭିଯୁକ୍ତଙ୍କୁ ଗିରଫ କରିଥିଲା, କିନ୍ତୁ ପରେ ଜାମିନ ପ୍ରଦାନ କରାଯାଇଥିଲା। ଏଭଳି କ୍ଷେତ୍ରରେ ମନୋଜଙ୍କ ଉପରେ କୋର୍ଟ କି ଦଣ୍ଡାଦେଶ ଦେବେ ଓ ଜରିମାନା ଆଦାୟ କରିବେ, ତାହା ମଧ୍ୟ ଏକ ଉଦାହରଣ ହେବ।
