୧୦୦ ବର୍ଗଫୁଟ ଜାଗାରେ ଚାଷ କରି ଲକ୍ଷାଧିକ ଟଙ୍କା ରୋଜଗାର କରିବା ବିଷୟ ଶୁଣି ଆଶ୍ଚର୍ଯ୍ୟ ଲାଗୁଥିବ। ହେଲେ ଏହା ସତ୍ୟ। ନୋଏଡାର ଅବସରପ୍ରାପ୍ତ ଇଂ ରମେଶ ଗେରା ୧୦୦ ବର୍ଗଫୁଟ ଘରେ କେସର ଚାଷ କରି ଅନେକ ଲକ୍ଷ ଟଙ୍କା ରୋଜଗାର କରିବା ସହ ଅନ୍ୟମାନଙ୍କୁ ଏହି ଚାଷ ସମ୍ପର୍କରେ ପ୍ରଶିକ୍ଷଣ ମଧ୍ୟ ଦେଉଛନ୍ତି। ୧୯୮୦ରେ ଏନ୍ଆଇଟି କୁରୁକ୍ଷେତ୍ରରୁ ଇଲେକ୍ଟ୍ରିକାଲ ଇଞ୍ଜିନିଇରିଂରେ ଡିଗ୍ରୀ ହାସଲ କରିଛନ୍ତି। ଦୀର୍ଘ ୩୫ ବର୍ଷ ଚାକିରି କରିବା ପରେ ଅବସର ନେଇ ଏବେ ଏହି ଚାଷ କରୁଛନ୍ତି ୬୪ ବର୍ଷୀୟ ରମେଶ। ଭାରତର କଶ୍ମୀରରେ କେବଳ କେସର ଚାଷ ହେଉଛି। କିନ୍ତୁ ରମେଶଙ୍କ ଏହି ସଫଳତା ଅନେକଙ୍କୁ କୌଣସି ସ୍ଥାନରେ କେସର ଚାଷ କରିବାର ବାଟ ଦେଖାଇଛି। ସେ ଦକ୍ଷିଣ କୋରିଆରୁ ଅତ୍ୟାଧୁନିକ କୃଷି ସମ୍ପର୍କରେ ଶିକ୍ଷା କରିବା ପରେ ଏହି ଚାଷ କରୁଛନ୍ତି। କେସର ଚାଷ ପାଇଁ ଗୋଟିଏ ପର୍ଯ୍ୟାୟରେ ୪ ମାସ ସମୟ ଲାଗୁଛି ଓ ଏହି ସମୟରେ କେସର ଉତ୍ପାଦନ ହୋଇପାରୁଛି। ଚାଷ ପାଇଁ ଅଧିକ ଖର୍ଚ୍ଚ କହିଲେ କେବଳ ବିଦ୍ୟୁତ୍ ଖର୍ଚ୍ଚ ଯାହା ୪ରୁ ୫ ହଜାର ପଡୁଛି। ପ୍ରଥମେ ସେ ୪ ଲକ୍ଷ ମଞ୍ଜିକୁ ୨ ଲକ୍ଷ ଟଙ୍କା ଦେଇ କଶ୍ମୀରରୁ ଆଣିଥିଲେ। ଉତ୍ପାଦନ ପରେ ସେ ୧ କେଜି କେସରକୁ ୨.୫ ଲକ୍ଷ ଟଙ୍କାରେ ବିକୁଛନ୍ତି ଏବଂ ଖୁଚୁରାରେ ବିକିଲେ ୩.୫ ଲକ୍ଷ ଟଙ୍କା ପାଉଛନ୍ତି।
