ପରିବେଶକୁ କାର୍ବନମୁକ୍ତ କରିବା ପାଇଁ ବିଭିନ୍ନ ଯୋଜନା କାର୍ଯ୍ୟକାରୀ କରାଯାଉଥିଲେ ବି ମହାରାଷ୍ଟ୍ରର ଏକ ଏନ୍ଜିଓର ସଫଳତା ଉଦାହରଣ ସୃଷ୍ଟି କରିଛି। ଆୟୁର୍ବେଦିକ୍ ଡାକ୍ତର ଦମ୍ପତି ପ୍ରସାଦ ଓ ହର୍ଷଦା ଦେଓଧରଙ୍କ ଦ୍ୱାରା ପ୍ରତିଷ୍ଠିତ ଭଗୀରଥ ଗ୍ରାମ୍ୟ ବିକାଶ ପ୍ରତିଷ୍ଠାନ ଦ୍ୱାରା ମହାରାଷ୍ଟ୍ର ସିନ୍ଧୁଦୁର୍ଗ ଜିଲାର ନିଭାଜି ଗାଁ ସବୁଜ ଗୃହବାଷ୍ପ ନିର୍ଗମନମୁକ୍ତ ଗ୍ରାମ ହୋଇପାରିଛି। ପରିବେଶ ଉପଯୋଗୀ ପଦକ୍ଷେପ ଯଥା ବାୟୋଗ୍ୟାସ୍ ୟୁନିଟ୍, ରାସାୟନିକ ସାର ଓ କୀଟନାଶକ ମୁକ୍ତ ବା ଜୈବିକ କୃଷି, ବାଉଁଶ ରୋପଣ ଆଦି ଦ୍ୱାରା ଗାଁକୁ କାର୍ବନ ନିର୍ଗମନ ମୁକ୍ତ କରାଯାଇପାରିଛି। ଏହି ଗାଁରେ ପାଖାପାଖି ୩୫୦ ପରିବାର ରହନ୍ତି ଓ ଏହାର ୪୮% ଏବେ ଜଙ୍ଗଲରେ ପରିପୂର୍ଣ୍ଣ। କିନ୍ତୁ ଲୋକେ ଜାଳେଣି କାଠ ବଦଳରେ ବାୟୋଗ୍ୟାସ୍ ବ୍ୟବହାର କରୁଛନ୍ତି। କୃଷକମାନେ ରାସାୟନିକ ସାର ଓ କୀଟନାଶକ ବ୍ୟବହାର ନ କରି ଜୈବିକ କୃଷି କରୁଛନ୍ତି। ବଡ଼ କଥା ହେଲା, ଗ୍ରାମବାସୀ ବ୍ୟାପକ ବାଉଁଶ ଗଛ ଲଗାଇଛନ୍ତି। ଏହା ବାୟୁମଣ୍ଡଳରୁ କାର୍ବନ ଡାଇଅକ୍ସାଇଡ୍ ଶୋଷଣ କରୁଛି। ପ୍ରତ୍ୟେକ ପରିବାର ଗୋଟିଏ ଲେଖା ବାଉଁଶ ଜଙ୍ଗଲ ସୃଷ୍ଟି କରିଛନ୍ତି। ନିଭାଜିକୁ କାର୍ବନ ନିର୍ଗମନମୁକ୍ତ କରିବା ଲାଗି ୨୦୦୪ରୁ ଅଭିଯାନ ଆରମ୍ଭ କରାଯାଇଥିଲା। ଏହି ସବୁଜ ଗ୍ରାମ ଏବେ ସବୁଜ ପର୍ଯ୍ୟଟନ ପାଇଁ ବାଟ ଖୋଲିଦେଇଛି।
