ପରିବେଶ ପାଇଁ କ୍ଷତିକାରକ ପ୍ଲାଷ୍ଟିକ୍ ଜିନିଷଠାରୁ ଦୂରେଇ ରହିବା ଲାଗି ଏହାର ବିକଳ୍ପ ଭାବେ ବାଉଁଶ ଜିନିଷ ପ୍ରସ୍ତୁତ କରିଛନ୍ତି କୋଲକାତାର ଅଗ୍ନି ମିତ୍ର। ସେ ‘ଆମୁଡୋ ଇକୋ ପ୍ରଡକ୍ଟ’ ଷ୍ଟାର୍ଟଅପ୍ ପ୍ରତିଷ୍ଠା କରି ତା’ ମାଧ୍ୟମରେ ନିତ୍ୟବ୍ୟବହାର୍ଯ୍ୟ ବାଉଁଶ ଉତ୍ପାଦ ତିଆରି କରୁଛନ୍ତି। ବାଉଁଶରେ ଟୁଥ୍ ବ୍ରଶ୍ଠାରୁ ଆରମ୍ଭ କରି ପାନିଆ ଏବଂ ସେଲ୍ଫ କେୟାର ପ୍ରଡକ୍ଟ ଆଦି ପ୍ରସ୍ତୁତ କରାଯାଉଛି। ଅଗ୍ନି ଜର୍ମାନୀରୁ ମେଡିକାଲ ଫଟୋନିକ୍ସରେ ସ୍ନାତକୋତ୍ତର ଡିଗ୍ରୀ ହାସଲ କରିଛନ୍ତି। ସେଠାରେ ଥିବା ସମୟରେ ପରିବେଶ ଉପଯୋଗୀ ବାଉଁଶ ଉତ୍ପାଦ ବ୍ୟବହାର କରିବା ଆରମ୍ଭ କରିଥିଲେ। ଭାରତକୁ ଫେରିବା ପରେ ପ୍ଲାଷ୍ଟିକର ନକାରାମତ୍କ ପ୍ରଭାବରୁ ଲୋକଙ୍କୁ ମୁକ୍ତ ରଖିବା ଓ ବର୍ଜ୍ୟଜନିତ ପ୍ରଦୂଷଣରୁ ପରିବେଶକୁ ରକ୍ଷା କରିବା ଲକ୍ଷ୍ୟରେ ବାଉର୍ଁଶ ଉତ୍ପାଦକୁ ଲୋକମାନଙ୍କ ପାଖରେ ପହଞ୍ଚାଇବା ଲାଗି କାର୍ଯ୍ୟ ଆରମ୍ଭ କରିଥିଲେ। ୨୦୧୮ରେ ଆମୁଡୋ ଇକୋ ପ୍ରଡକ୍ଟ ଷ୍ଟାର୍ଟଅପ୍ ଗଠନ କରିବା ପରେ ଏବେ ସେଥିରେ ତାଙ୍କ ସହ ୪୦ ଜଣିଆ ଟିମ୍ କାମ କରୁଛି। ଏହି ବ୍ୟବସାୟରେ ଅଗ୍ନି ବାର୍ଷିକ ୨.୬୫ କୋଟି ଟଙ୍କା କାରବାର କରୁଛନ୍ତି। ଏବେ ତାଙ୍କ ଉତ୍ପାଦକୁ ୧୦୦ କର୍ପୋରେଟ ଓ ହୋଟେଲ ନିୟମିତ ଭାବେ ନେଉଛନ୍ତି। ଦିନକୁ ଦେଶରେ ସେ ପାଖାପାଖି ୫୦୦ରୁ ଊର୍ଦ୍ଧ୍ୱ ଅର୍ଡର ପାଉଛନ୍ତି। କେବଳ ଏତିକି ନୁହେଁ ଦୁବାଇ, ଇଂଲଣ୍ଡ, ମାଲେସିଆ, ସିଙ୍ଗାପୁର, ଜର୍ମାନୀ ଏବଂ ସ୍ଲୋଭାକିଆରୁ ବି ତାଙ୍କୁ ଅର୍ଡର ମିଳୁଛି।
