ଦିନକୁ ଦିନ ଦୁଇଚକିଆ ଯାନର ବିଭିନ୍ନ ମଡେଲ ବଜାରକୁ ଆସୁଛି। ଇ-ବାଇକ୍ ହେଉ କିମ୍ବା ପେଟ୍ରୋଲଚାଳିତ, ପ୍ରତ୍ୟେକ ମଡେଲର ଆଦର ମଧ୍ୟ ବଢ଼ିବାରେ ଲାଗିଛି। ଯେତେ ନୂଆ, ସେତେ ପସନ୍ଦ, ହେଲେ ପୁରୁଣା ଗାଡ଼ି ସାଇତି ରଖିବା ଲୋକ ବହୁତ କମ୍। ଏମାନଙ୍କ ମଧ୍ୟରେ ମହାରାଷ୍ଟ୍ର ପୁଣେର ବିନିତ୍ କେଞ୍ଜାଲେ ଅନ୍ୟତମ। ସେ ପଞ୍ଚଗାନି-ମହାବଳେଶ୍ୱର ରାସ୍ତା କଡ଼ ଗାଁ ମେଟରୁଆଡ୍ରେ ଏକ ମ୍ୟୁଜିୟମ୍ ଖୋଲି ୫୦୦ରୁ ଊର୍ଦ୍ଧ୍ୱ ପୁରୁଣା ଗାଡ଼ି ରଖିଛନ୍ତି। ଏହା ଭାରତର ପ୍ରଥମ ପୁରୁଣା ଦୁଇଚକିଆ ଯାନ ମ୍ୟୁଜିୟମ୍। ଏଥିରେ ଦ୍ୱିତୀୟ ବିଶ୍ୱଯୁଦ୍ଧ ସମୟରେ ବ୍ୟବହୃତ ଗିର୍ନାର ସ୍କୁଟରଠାରୁ ଆରମ୍ଭ କରି ‘ବବି’ ବାଇକ୍ ଓ ୮୦ ଦଶକର ଦୁଇଚକିଆ ଯାନ ଆଦି ସ୍ଥାନ ପାଇଛି। ଏହା ବ୍ୟତୀତ ଜଓ୍ବାର ପ୍ରଥମ ମୋଫେଡ୍, ବ୍ରିଟିଶ୍ ସୈନ୍ୟ ବ୍ୟବହାର କରୁଥିବା ରୟାଲ ଏନ୍ଫିଲ୍ଡର ଫାଣ୍ଟାବୁଲୋସ, ଲାମ୍ବ୍ରେଟା-୫୯, ରାମୋନା-୧୯୬୦ ଆଦି ବାଇକ୍ ଆକର୍ଷଣର କେନ୍ଦ୍ର ପାଲଟିଛି। ବିନିତ୍ ୨୦୨୧ରେ ଏହି ମ୍ୟୁଜିୟମ୍ ଆରମ୍ଭ କରିଥିଲେ। ମାତ୍ର ଦୁଇ ବର୍ଷ ମଧ୍ୟରେ ୫୦୦ରୁ ଊର୍ଦ୍ଧ୍ୱ ପୁରୁଣା ବାଇକ୍ ଯୋଗାଡ଼ କରିବାରେ ସକ୍ଷମ ହେବା ତାଙ୍କ ପାଇଁ ବଡ଼ ଉପଲବ୍ଧି ବୋଲି କହନ୍ତି ୫୬ ବର୍ଷୀୟ ବିନିତ୍। ଏହି ମ୍ୟୁଜିୟମ୍କୁ ବହୁ ପର୍ଯ୍ୟଟକ ଆସୁଛନ୍ତି ଓ ସେମାନେ ପୁରୁଣା ଗାଡ଼ିକୁ ଦେଖି ପୁରୁଣା ଦିନର ସ୍ମୃତିକୁ ଉଜାଗର କରୁଛନ୍ତି। ମ୍ୟୁଜିୟମ ବୁଲି ଦେଖିବା ଲାଗି ପ୍ରବେଶ ଦେୟ ୧୦୦ ଟଙ୍କା ରଖାଯାଇଛି।
