ଯୁବକମାନଙ୍କ ପାଇଁ ପୁଣେର ହର୍ଷବର୍ଦ୍ଧନ ପଟବର୍ଦ୍ଧନ ଏକ ଆଦର୍ଶ। ୩୧ ବର୍ଷୀୟ ହର୍ଷବର୍ଦ୍ଧନ ଏମ୍ବିଏରେ ଡିଗ୍ରୀ ହାସଲ କରିଛନ୍ତି। ସେ ତ୍ରୟଦଶ କିମ୍ବା ଚତୁର୍ଦ୍ଦଶ ଶତାବ୍ଦୀ ମଧ୍ୟରେ ଆରମ୍ଭ ହୋଇଥିବା କୋହ୍ଲାପୁରୀ ଚପଲର ଲୋକପ୍ରିୟତା ବଢ଼ାଇବାରେ ସଫଳ ହୋଇଛନ୍ତି। ଚପଲ ତିଆରି କରିବାରେ ସେ ୨୦୧୫ରେ ମାତ୍ର ୫,୦୦୦ ଟଙ୍କା ନିବେଶ କରିଥିଲେ, ଯାହା ଏବେ ୯ କୋଟି ଟଙ୍କାରେ ପହଞ୍ଚତ୍ଲାଣି। ସେ ସେଥିରେ ପାରମ୍ପରିକ ପଦ୍ଧତିରେ ନୂଆ ଡିଜାଇନ୍ ଦେଉଛନ୍ତି ଓ ଏଥିପାଇଁ ହର୍ଷବର୍ଦ୍ଧନ କାନପୁର, ଆଗ୍ରା, ଚେନ୍ନାଇ ଯାଇ ସେଠାରୁ ଚପଲ ତିଆରି କୌଶଳ ଶିକ୍ଷା କରିଛନ୍ତି। ପ୍ରଥମେ ସେ ଚପଲ ତିଆରି କରି ସାଙ୍ଗମାନଙ୍କୁ ଦେଇଥିଲେ। ସେ ପୁଣେରେ ଏକ ଷ୍ଟଲ୍ ଖୋଲି ଦିନକରେ ୧୦୦ ଚପଲ ବିକ୍ରି କରିଥିଲେ। ପରେ ତାଙ୍କ ଚପଲର ଆଦର ବଢ଼ିବାରେ ଲାଗିଲା ଓ ଦିନକୁ ଦିନ ସେ ଅଧିକରୁ ଅଧିକ ଅର୍ଡର ପାଇବାକୁ ଲାଗିଲେ। ଏବେ ସେ ଚପଲ ତିଆରିରେ ୨୫ ଜଣ ଲୋକଙ୍କୁ ନିଯୁକ୍ତ କରିଛନ୍ତି ଓ ମାସକୁ ୧,୫୦୦ ଅର୍ଡର ପାଉଛନ୍ତି। ତାଙ୍କ ଚପଲର ମୂଲ୍ୟ ୨,୦୦୦ରୁ ଆରମ୍ଭ ହୋଇ ୫୦,୦୦୦ ଟଙ୍କା ଯାଏ ରହିଛି। କେବଳ ପୁଣେରେ ଏହି ଚପଲର ୩୫,୦୦୦ରୁ ଊର୍ଦ୍ଧ୍ୱ ଉପଭୋକ୍ତା ସୃଷ୍ଟି କରିଛନ୍ତି। ଏହାବ୍ୟତୀତ ଦେଶର ପ୍ରାୟ ସବୁ ବଡ଼ ସହର ସମେତ ୟୁରୋପ ଓ ଆମେରିକା ଭଳି ୨୭ଟି ଦେଶରେ ତାଙ୍କ ଚପଲର ଚାହିଦା ବଢ଼ିଛି।
