ସମସ୍ତେ ଜାଣନ୍ତି ଯେ ଗୋବରରୁ ଖତ ହୁଏ, ଗୋବରରୁ ଉତ୍ପନ୍ନ ଗ୍ୟାସ୍ରେ ରୋଷେଇ କରାଯାଏ। କିନ୍ତୁ ଏ ବିଷୟ କେବେ ଶୁଣିଛନ୍ତି କି ଗୋବରରୁ କାଗଜ ପ୍ରସ୍ତୁତ ହୁଏ। ହଁ, ଏମିତି କାର୍ଯ୍ୟ କରୁଛନ୍ତି ରାଜସ୍ଥାନ ଜୟପୁରର ଭୀମ ରାଜ୍ ଶର୍ମା। ଭୀମ ଗୋବରରୁ କାଗଜ ପ୍ରସ୍ତୁତ କରି ବର୍ଷକୁ ୧ କୋଟି ଟଙ୍କାରୁ ଅଧିକ ରୋଜଗାର କରିବାକୁ ସକ୍ଷମ ହୋଇଛନ୍ତି। ୨୦୧୪ରେ ସେ ହାତୀ ମଳରୁ କାଗଜ ତିଆରି ହେବା ଜାଣିବା ପରେ ଗୋବରରୁ କାଗଜ ପ୍ରସ୍ତୁତ କରିବା ପାଇଁ ଯୋଜନା କରିଥିଲେ। ପରେ ଏଥିସକାଶେ କାମ ଆରମ୍ଭ କରିବା ଲାଗି ସାଙ୍ଗସାଥୀ ଓ ପରିବାର ଲୋକଙ୍କଠାରୁ ଅର୍ଥ ଯୋଗାଡ଼ କରିବା ସମୟରେ ତାଙ୍କୁ ‘ପାଗଳ’ ବୋଲି ସମସ୍ତେ କହିଲେ। ହେଲେ ସେ ସବୁ ପ୍ରତିକୂଳ ସ୍ଥିତିକୁ ଏଡ଼ାଇଯାଇ ୨୦୧୭ରେ ୩୦ ଲକ୍ଷ ଟଙ୍କା ନିବେଶ କରି ‘ଗୋକୃତି’ ସଂସ୍ଥା ପ୍ରତିଷ୍ଠା କରି କାଗଜ ଉତ୍ପାଦନ ଆରମ୍ଭ କରିଥିଲେ। ସେ ଗୋବର, ଗୋମୂତ୍ର ଓ ବର୍ଜ୍ୟ ସୂତାକପଡ଼ା ବ୍ୟବହାର କରି କାଗଜ ତିଆରି କରୁଛନ୍ତି। ପ୍ରତିଦିନ ୩୦୦୦ ସିଟ୍ କାଗଜ ବିକ୍ରି କରୁଛନ୍ତି। ଭୀମ ବର୍ତ୍ତମାନ ଦିଲ୍ଲୀ, ମୁମ୍ବାଇ, ଚେନ୍ନାଇ, ବେଙ୍ଗାଲୁରୁ, ହାଇଦ୍ରାବାଦ ଆଦି ସହରକୁ କାଗଜ ପଠାଉଛନ୍ତି। କାଗଜ ପାଇଁ ଗୋବର ଓ ଗୋମୂତ୍ର ଆଖପାଖ ଅଞ୍ଚଳର କୃଷକମାନଙ୍କଠାରୁ ସଂଗ୍ରହ କରୁଛନ୍ତି ଓ ସେମାନଙ୍କୁ ପ୍ରାପ୍ୟ ମଧ୍ୟ ଦେଉଛନ୍ତି।
