ଧନୀ ଲୋକଙ୍କ ପାଇଁ ଦାମୀ ତଥା ଉନ୍ନତମାନର ଦେହଲଗା ସାବୁନ ପାଇବାରେ କିଛି ସମସ୍ୟା ନ ଥିବାବେଳେ ଆମ ଦେଶରେ ଗରିବମାନେ ଏହା ପାଇପାରି ନ ଥା’ନ୍ତି। ହେଲେ ସମୀର ଲଖାନୀଙ୍କ ପ୍ରୟାସରେ ଗରିବ ଲୋକମାନେ ଭଲ ସାବୁନ ପାଇପାରୁଛନ୍ତି। ସେ ୨୦୧୪ରେ ‘ଇକୋ ସପ୍ ବ୍ୟାଙ୍କ’ ଗଠନ କରି ତା’ ମାଧ୍ୟମରେ ଏହି କାର୍ଯ୍ୟ କରୁଛନ୍ତି। ସମୀର ବିଭିନ୍ନ ହୋଟେଲରୁ ବ୍ୟବହୃତ ସାବୁନ ସଂଗ୍ରହ କରି ତାହାକୁ ରିସାଇକ୍ଲିଂ କରି ସ୍ବଚ୍ଛ ବା ବିଶୁଦ୍ଧ ସାବୁନ ପ୍ରସ୍ତୁତ କରୁଛନ୍ତି ଏବଂ ଏହାକୁ ଗରିବ ଲୋକଙ୍କୁ ମାଗଣାରେ ଯୋଗାଇ ଦେଉଛନ୍ତି। ସାଧାରଣତଃ ହୋଟେଲରେ ଗେଷ୍ଟମାନଙ୍କୁ ମାଗଣାରେ ଦିଆଯାଉଥିବା ସାବୁନକୁ ସେମାନେ କିଞ୍ଚିତ ବ୍ୟବହାର କରନ୍ତି କିମ୍ବା ଆଦୌ ବ୍ୟବହାର ନ କରି ଛାଡ଼ି ଚାଲିଯାଆନ୍ତି, ଯାହା ବର୍ଜ୍ୟଗଦାକୁ ଚାଲିଯାଏ। ତେବେ ସମୀର ୮ ବର୍ଷ ମଧ୍ୟରେ ସେମିତିକା ୧.୪ ମିଲିୟନ ବ୍ୟବହୃତ ସାବୁନ ହୋଟେଲଗୁଡ଼ିକରୁ ସଂଗ୍ରହ କରି ତାହାକୁ ରିସାଇକ୍ଲିଂ କରିସାରିଲେଣି। କେବଳ ଭାରତରେ ନୁହେଁ ସେ ବିଶ୍ୱରେ ୧୦ଟି ବିକାଶଶୀଳ ଦେଶରେ ୧୬ଟି ରିସାଇକ୍ଲିଂ ଶାଖା ଖୋଲିଛନ୍ତି।
