ସେବା ଆଗରେ ଧନସମ୍ପତ୍ତି ତୁଚ୍ଛ, ଯାହା ପ୍ରମାଣ କରିଛନ୍ତି କେରଳ କୋଟ୍ଟାୟାମର କରୁସେରିଲ ଏନ୍ ଥନ୍କଆମ୍ମା ।
ତାଙ୍କୁ ଏବେ ବୟସ ୮୯। ଥନକ୍ଆମ୍ମା ଥାମ୍ପଲାକଡର ଏନଏସ୍ଏସ୍ ଅପର ପ୍ରାଇମେରୀ ସ୍କୁଲରେ ହିନ୍ଦୀ ଶିକ୍ଷୟିତ୍ରୀ ଥିଲେ। ଅବସର ନେବା ପରେ ବିଭିନ୍ନ ସେବା କାର୍ଯ୍ୟରେ ନିଜକୁ ନିୟୋଜିତ କରିବା ସହ ଏବେ ତାଙ୍କ ପୁରୁଣା ପୈତୃକ ଗୃହକୁ ବୟସ୍କ ମହିଳାମାନଙ୍କ ସେବା ଲାଗି ଛାଡ଼ି ଦେଇଛନ୍ତି। ଏହି ସେବା ଗୃହର ନାମ ରଖିଛନ୍ତି ମାନଭୋଦ୍ୟା ପାକଲ୍ଭେଦୁ। ୨୦୧୭ରେ ଏହାକୁ ପଞ୍ଜୀକରଣ କରି ସେବା କାର୍ଯ୍ୟ ଆରମ୍ଭ କରିଥିଲେ। ମୋଟରେ ଏବେ ତାଙ୍କ ପାଖରେ ୩୦ ଜଣ ବୟସ୍କା ମହିଳା ରହୁଛନ୍ତି। ସମସ୍ତଙ୍କ ବୟସ ୬୦ରୁ ଊର୍ଦ୍ଧ୍ୱ। ତାଙ୍କ ଘରେ କିଛି ମହିଳା କର୍ମଚାରୀ ମହମବତୀ, ଧୂପକାଠି, କାଗଜ ବ୍ୟାଗ, ଡିଟରଜେଣ୍ଟ ଆଦି ପ୍ରସ୍ତୁତ କରୁଛନ୍ତି ଓ ଏହି ବୟସ୍କା ମହିଳାମାନେ ସେଗୁଡ଼ିକୁ ପ୍ୟାକିଂ କରୁଛନ୍ତି। ସେମାନଙ୍କୁ ସହଯୋଗ କରିବାରେ ଦୁଇ ଜଣ ଯୁବତୀଙ୍କୁ ମଧ୍ୟ ନିଯୁକ୍ତ କରାଯାଇଛି। ଏହି କାର୍ଯ୍ୟରେ ଥନକ୍ଆମ୍ମା ପେନ୍ସନ ଅର୍ଥ ଖର୍ଚ୍ଚ କରିବା ସହ ତାଙ୍କ ସନ୍ତାନମାନେ ବି ଆର୍ଥିକ ସହଯୋଗ କରୁଛନ୍ତି। ସେ ଏହି ଗୃହରେ ଏକ କମ୍ପ୍ୟୁଟର ସେଣ୍ଟର ଖୋଲି ମାଗଣାରେ ଶିକ୍ଷା ଦେଉଛନ୍ତି ଓ ଏହି କାର୍ଯ୍ୟରେ ଦୁଇଜଣ ଇନ୍ଷ୍ଟ୍ରକଟରଙ୍କୁ ନିଯୁକ୍ତ କରିଛନ୍ତି।
