ପରିବେଶ ସହନୀୟ ସବୁଜ ବିବାହ କରି ଅନ୍ୟମାନଙ୍କ ପାଇଁ ପ୍ରେରଣା ସାଜିଛନ୍ତି ଅଶ୍ୱିନୀ ମାଲଓ୍ବାଡେ ଏବଂ ନୂପୁର ଅଗ୍ରଓ୍ବାଲ। କେବଳ ଏତିକି ନୁହେଁ ଉଭୟ ଏଥିପାଇଁ ୨୦୨୦ରେ ଗ୍ରୀନ୍ ମୈନା ବା ସବୁଜ ସାରୀ ଅଭିଯାନ ଆରମ୍ଭ କରି ସବୁଜ ବିବାହ ଲାଗି ଲୋକମାନଙ୍କୁ ପ୍ରୋତ୍ସାହିତ କରୁଛନ୍ତି। ମୁମ୍ବାଇର ଭରଶୋଭା ବିଚ୍ ସଫା କରିବା ସମୟରେ ଅଶ୍ୱିନୀ ଓ ନୂପୁର ପରସ୍ପରକୁ ଭେଟିଥିଲେ। ପରେ ସମାନ ବିଚାରଧାରା ସେମାନଙ୍କୁ ନିକଟତର କରିଥିଲା ଓ ସବୁଜ ବିବାହ ଲାଗି ନିଷ୍ପତ୍ତି ନେଇ ଯୋଜନା ମୁତାବକ ସେମାନେ ପୁଣେରେ ବିବାହ କରିଥିଲେ। ପୁନଃ ବ୍ୟବହାର କରିହେବା ଭଳି ସାମଗ୍ରୀଗୁଡ଼ିକୁ ସେଠାରେ ବ୍ୟବହାର କରାଯିବା ସହ ବ୍ୟବହୃତ ଫୁଲକୁ ଖତ କରାଯାଇଥିଲା। ଦୁହେଁ ପରିବେଶ ଉପଯୋଗୀ ପୋଷାକ ପିନ୍ଧି ବିଦ୍ୟୁତ୍ଚାଳିତ କାର୍ରେ ବିବାହ ସ୍ଥଳରେ ପହଞ୍ଚିଥିଲେ। ଭୋଜିରେ କୌଣସି ଖାଦ୍ୟ ନଷ୍ଟ କରାଯାଇ ନ ଥିଲା। ବଳକା ଖାଦ୍ୟକୁ ଅସହାୟଙ୍କୁ ବାଣ୍ଟି ଦିଆଯାଇଥିଲା। ବର ଓ କନ୍ୟା ସବୁଜ ବାର୍ତ୍ତା ଦେବା ଲାଗି ବିବାହରେ ଯୋଗ ଦେଇଥିବା ଅତିଥିଙ୍କ ପାଇଁ ୪ଟି ଗଛ ରୋପଣ କରିଥିଲେ। ଉଭୟେ ମଧ୍ୟ ଅତିଥିମାନଙ୍କୁ ଉପହାର କାଗଜ ବ୍ୟାଗ୍ରେ ଦେଇଥିଲେ। ଏବେ ସୁଦ୍ଧା ସେମାନେ ଏହି ଧାରାରେ ବହୁ ସବୁଜ ବିବାହ କରାଇ ୩୦୦ ବୃକ୍ଷ ରୋପଣ କରିସାରିଲେଣି।
