ଗୋବର ଚପଲ କଥା ଶୁଣିଛନ୍ତି କି! ଏଭଳି ଚପଲ ତିଆରି କରୁଛନ୍ତି ଛତିଶଗଡ଼ର ରିତେଶ ଅଗ୍ରଓ୍ବାଲ। ୧୫ ବର୍ଷ ପୂର୍ବେ ରିତେଶ ଚାକିରି ଛାଡି ପ୍ରଥମେ ଗୋଶାଳାରୁ ଗୋବର ସଂଗ୍ରହ କରି ସେଥିରୁ ପରିବେଶ ଉପଯୋଗୀ ସାମଗ୍ରୀ ତିଆରି କରିବା ଆରମ୍ଭ କରିଥିଲେ। ପ୍ରଥମେ ସେ ରାଜସ୍ଥାନର ପ୍ରଫେସର ଶିବଦର୍ଶନ ମଲିକଙ୍କଠାରୁ ଗୋବରୁ ଇଟା ତିଆରି କରିବା ପ୍ରଶିକ୍ଷଣ ନେଇଥିଲେ। ପରେ ସେ ଗୋବର ଦୀପ ଓ ମୂର୍ତ୍ତି ଆଦି ତିଆରି କରିବା ଆରମ୍ଭ କରିଥିଲେ। ଏବେ ସୁଦ୍ଧା ସେ ଗୋବରରୁ ୩୦ରୁ ଊର୍ଦ୍ଧ୍ୱ ଦ୍ରବ୍ୟ ପ୍ରସ୍ତୁତ କରିଛନ୍ତି। ପ୍ରଥମ ଗୋବର ଚପଲ ସେ ତାଙ୍କ ଜେଜେମା’ଙ୍କ ପାଇଁ ତିଆରି କରିଥିଲେ। ତାହା ଦେଖି କେତେଜଣ ସେମାନଙ୍କ ପାଇଁ ସେଭଳି ଚପଲ କରିବା ଲାଗି ରିତେଶଙ୍କୁ ଅନୁରୋଧ କରିଥିଲେ। ଗୋବର ସହ ବିଭିନ୍ନ ଜିନିଷ ମିଶାଇ ସେ ଏହି ଚପଲ ପ୍ରସ୍ତୁତ କରୁଛନ୍ତି। ୧ କେଜି ଗୋବରରୁ ୧୦ଟି ଚପଲ ହେଉଛି ଓ ଦଶ ଦିନ ସମୟ ଲାଗୁଛି। ପ୍ରତ୍ୟେକ ଚପଲର ମୂଲ୍ୟ ରହିଛି ୪୦୦ ଟଙ୍କା। ଏହା ବର୍ଷାରେ ୩-୪ ଘଣ୍ଟା ଭିଜିଲେ ମଧ୍ୟ ନଷ୍ଟ ହେଉନହିଁ। ଖରାରେ ଶୁଖାଇ ତାହାକୁ ପୁନର୍ବାର ବ୍ୟବହାର କରାଯାଇପାରିବ ବୋଲି କହନ୍ତି ରିତେଶ। ଭାରତର ବିଭିନ୍ନ ସ୍ଥାନରୁ ଚପଲ ଲାଗି ତାଙ୍କୁ ଅର୍ଡର ମିଳୁଛି। ଏବେ ସୁଦ୍ଧା ରିତେଶ ୧୦୦୦ ଚପଲ ବିକ୍ରି କରି ସାରିଲେଣି।
