ମହିଳାମାନେ ଶବଦାହ କରିବାର ପରମ୍ପରା ନ ଥିବା ବେଳେ କେରଳର ସେଲିନା ମାଇକେଲ ଦୀର୍ଘ ଦଶନ୍ଧି ଧରି ଏହି କାର୍ଯ୍ୟ କରୁଛନ୍ତି। କୋଚିର କାକାଣ୍ଡାରେ ରହୁଥିବା ସେଲିନା ଶବଦାହ ଭଳି ଏକ ପବିତ୍ର କାର୍ଯ୍ୟ କରି ତାଙ୍କ ପରିବାର ପ୍ରତିପୋଷଣ କରନ୍ତି। ସେ କୋଚିରେ ଶବଦାହ ଗୃହର କର୍ମଚାରୀ ଭାବେ ରହି ୧୫ ବର୍ଷ ମଧ୍ୟରେ ହଜାର ହଜାର ମୃତଦେହ ଦାହ କରିସାରିଲେଣି। ସେଲିନା ଆବଶ୍ୟକ କାଠ ନିଜେ ସଂଗ୍ରହ sକରି ବିଧି ମୁତାବକ ଦାହ କରନ୍ତି ଓ ସେହି ସ୍ଥାନକୁ ସଫା କରିଥାନ୍ତି। ମୃତ ବ୍ୟକ୍ତିଙ୍କ ପରିବାର ବା ସମ୍ପର୍କୀୟଙ୍କଠାରୁ କଲ୍ ପାଇବା କ୍ଷଣି ପ୍ରସ୍ତୁତି ଆରମ୍ଭ କରିଦିଅନ୍ତି ଓ ଖୁବ୍ କମ୍ ସମୟରେ ଦାହ କାର୍ଯ୍ୟ ସମ୍ପାଦନ କରନ୍ତି। ୨୦ ବର୍ଷ ପୂର୍ବେ ସେଲିନାଙ୍କୁ ତାଙ୍କ ସ୍ବାମୀ ଘରୁ ବାହାର କରିଦେବା ପରେ ସେ ଏହି କାର୍ଯ୍ୟ ଆରମ୍ଭ କରିଥିଲେ। ସାମାଜିକ ବାରଣ ସତ୍ତ୍ୱେ ପିଲାଙ୍କ ଯତ୍ନ ନେବା ଓ ଋଣ ଶୁଝିବା ପାଇଁ ଏ କ୍ଷେତ୍ରରେ ପାଦ ଦେଇଥିବା କହନ୍ତି ୫୮ ବର୍ଷୀୟା ସେଲିନା। ପ୍ରଥମେ ସେ ଜଣେ ଦିନ ମଜୁରିଆ ଭାବେ କାର୍ଯ୍ୟ କରିଥିଲେ। ହେଲେ ମଜୁରି ଅର୍ଥ ପରିବାର ପାଇଁ ପର୍ଯ୍ୟାପ୍ତ ନ ହେବାରୁ ସେ ଶ୍ମଶାନ କର୍ମଚାରୀ ଭାବେ ଯୋଗ ଦେଇଥିଲେ। ଗୋଟିଏ ମୃତଦେହ ଦାହ କରିବାକୁ ସେ ୧୦୦୦ ଟଙ୍କା ନିଅନ୍ତି। ଏଥିରେ କାଠ କିଣନ୍ତି ଓ ମ୍ୟୁନିସିପାଲିଟିକୁ ୭୮୦ ଟଙ୍କା ଦିଅନ୍ତି। ଆଉ ଯାହା ବଳେ ତାହା ତାଙ୍କ ପାରିଶ୍ରମିକ।
