ମନ୍ଦିରରେ ଦିଅଁସେବା ପରେ ଫିଙ୍ଗି ଦିଆଯାଉଥିବା ଫୁଲକୁ ସଂଗ୍ରହ କରି ତାହାର ପୁନଃ ଉପଯୋଗ କରୁଛନ୍ତି ସୁରଟର ୨୨ ବର୍ଷୀୟା ଇଞ୍ଜିନିୟର ମୈତ୍ରୀ ଜରିଓ୍ବାଲା। ସେ ଏହି ଫୁଲରୁ ୧୦ ପ୍ରକାର ଉତ୍ପାଦ ତିଆରି କରିବା ସହ ବର୍ଜ୍ୟ ସମସ୍ୟା ସମାଧାନ କରିପାରୁଛନ୍ତିି। ଗତବର୍ଷ ହୋଲି ସମୟରେ ସେ ଶୁଖିଲା ଫୁଲରୁ ରଙ୍ଗ ପ୍ରସ୍ତୁତ କରି ତାଙ୍କ ବିଜ୍ନେସ (ଡ୍ରାଏଡ୍ ଫ୍ଲାଓ୍ବାର୍ ବିଜ୍ନେସ)ର ପ୍ରଥମ ସଫଳତା ପାଇଥିଲେ। ପରେ ସେ ତାଙ୍କ କାର୍ଯ୍ୟକୁ ସମ୍ପ୍ରସାରିତ କରି କେତେଜଣ ଲୋକଙ୍କୁ ନିଯୁକ୍ତ କରିଛନ୍ତି ଏବଂ ଦିନକୁ ୭୦ କେ.ଜି. ବର୍ଜ୍ୟ ଫୁଲର ଉଚିତ ଉପଯୋଗ କରିପାରୁଛନ୍ତି। ମନ୍ଦିରରୁ ଫୁଲ ସଂଗ୍ରହ କରିବା ଲାଗି ସୁରଟ ନଗର ନିଗମର ଅନୁମତି ନେଇଛନ୍ତି। ବର୍ତ୍ତମାନ ସହରର ୧୦ଟି ମନ୍ଦିରରୁ ଫୁଲ ସଂଗ୍ରହ କରାଯାଉଛି। ମୈତ୍ରୀ ଏବଂ ତାଙ୍କ ଟିମ୍ ଏହିସବୁ ଫୁଲରୁ ଅତର, ମହମବତି, ଅଗରବତି, ଜିଆଖତ ଏବଂ ହୋଲି ସମୟରେ ଜୈବିକ ରଙ୍ଗ ପ୍ରସ୍ତୁତ କରୁଛନ୍ତି। ସବୁଠୁ ବଡ଼ କଥା ହେଉଛି ଏସବୁ ଜିନିଷ ଲୋକମାନେ ହାତରେ ତିଆରି କରୁଛନ୍ତି, କୌଣସି ମେଶିନ ବ୍ୟବହାର କରାଯାଉନାହିଁ। ସବୁ ଖର୍ଚ୍ଚ ବାଦ୍ ସେ ଏହି ବିଜ୍ନେସରୁ ମାସକୁ ୩୦ରୁ ୪୦ ହଜାର ଟଙ୍କା ରୋଜଗାର କରୁଛନ୍ତି। ଏହି କାର୍ଯ୍ୟ ସକାଶେ ଗୁଜରାଟ ସରକାର ତାଙ୍କୁ ‘ରିସାଇକ୍ଲିଂ ହିରୋ’ ଭାବେ ସମ୍ମାନିତ କରିଛନ୍ତି।
