ଚେନ୍ନାଇର ଥରାଗଇ ଆର୍ଥନାଙ୍କ ପରିବେଶ ଚିନ୍ତା ତାଙ୍କୁ ସ୍ବତନ୍ତ୍ର କରିପାରିଛି। ତାଙ୍କ ବୟସ ୮। ଚେନ୍ନାଇର କରାପାକ୍କମରେ ରହନ୍ତି ଥରାଗଇଙ୍କ ପରିବାର। ଜଣେ କୁନି ସ୍କୁବା ଡାଇଭର ଭାବେ ସେ ପରିଚିତ ଓ ସମୁଦ୍ରରୁ ପ୍ଲାଷ୍ଟିକ ବର୍ଜ୍ୟ ବାହାର କରି ସାମୁଦ୍ରିକ ଜୀବଙ୍କ ଜୀବନ ସୁରକ୍ଷିତ କରୁଛନ୍ତି। ବିଶାଳ ସମୁଦ୍ରରେ ତାଙ୍କର ଏହି କ୍ଷୁଦ୍ର ପ୍ରୟାସ ଅନ୍ୟମାନଙ୍କ ପାଇଁ ଏକ ପ୍ରେରଣା ନିଶ୍ଚୟ। ଥରାଗଇଙ୍କ ପିତା ଅରବିନ୍ଦ ଆର୍ଥନା ବି ଜଣେ ସ୍କୁବା ଡାଇଭର ଓ ତାଙ୍କର ଚେନ୍ନାଇରେ ଏକ ଡାଇଭିଂ ସେଣ୍ଟର ରହିଛି। ସେଠାରେ ୫ ବର୍ଷ ବୟସରୁ ଡାଇଭିଂ ପ୍ରଶିକ୍ଷଣ ନେବା ଆରମ୍ଭ କରିଥିଲେ ଥରାଗଇ। ସମୁଦ୍ରରୁ ପ୍ଲାଷ୍ଟିକ୍ ବର୍ଜ୍ୟ ବାହାର କରିବାରେ ତାଙ୍କୁ ସହଯୋଗ କରୁଛନ୍ତି ତାଙ୍କ ପିତା। ଏବେ ସୁଦ୍ଧା ବାପ ଓ ଝିଅ ମିଶି ୬୦୦ କେ.ଜି. ପ୍ଲାଷ୍ଟିକ ବୋତଲ ସଂଗ୍ରହ କରିସାରିଲେଣି। ଏହାକୁ ସେମାନେ ରିସାଇକ୍ଲିଂ ସେଣ୍ଟରକୁ ବିକ୍ରି କରିଛନ୍ତି ଓ ଏହି ଟଙ୍କାକୁ ପରିବେଶ ବିଭାଗକୁ ଦାନ କରିବା ଲାଗି କହିଛନ୍ତି ଥରାଗଇ।
