କାର୍କୁ ମୋବାଇଲ୍ କ୍ଲିନିକ୍ କରି ରୋଗୀ ସେବାର ଉଦାହରଣ ସୃଷ୍ଟି କରିଛନ୍ତି ଡ. ସୁନୀଲ କୁମାର ହେବି। ବେଙ୍ଗାଲୁରୁ ଓ ଏହାର ଆଖପାଖ ଅଞ୍ଚଳରେ ୧୦ ବର୍ଷ ମଧ୍ୟରେ ୮୦୦ ମେଡିକାଲ କ୍ୟାମ୍ପ କରି ୧.୨ ଲକ୍ଷରୁ ଊର୍ଦ୍ଧ୍ୱ ରୋଗୀଙ୍କୁ ମାଗଣାରେ ଚିକିତ୍ସା କରିବାକୁ ସକ୍ଷମ ହୋଇପାରିଛନ୍ତି। ବେଙ୍ଗାଲୁରୁର ମାଲ୍ଲେଶ୍ୱରମ୍ରେ ରହନ୍ତି ଡ. ସୁନୀଲ। ୨୦୧୦ରେ ସଡ଼କ ଦୁର୍ଘଟଣାଗ୍ରସ୍ତ ଜଣେ ବ୍ୟକ୍ତିଙ୍କୁ ତୁରନ୍ତ ଚିକିତ୍ସା ଯୋଗାଇଦେବାର ବ୍ୟବସ୍ଥା କରି ତାଙ୍କୁ ସୁସ୍ଥ କରିବା ପରେ ତାଙ୍କ ମନ ବଦଳି ଯାଇଥିଲା। ଏହି ଘଟଣା ପରେ ୨୦୧୧ରେ ବିଜିଏସ୍ ଗ୍ଲୋବାଲ ହସ୍ପିଟାଲରୁ ସେ ଚାକିରି ଛାଡ଼ି ତାଙ୍କ କାର୍କୁ ମୋବାଇଲ୍ କ୍ଲିନିକ୍ କରି ବୁଲି ବୁଲି ରୋଗୀ ସେବା କରିବା ଆରମ୍ଭ କରିଥିଲେ। ଏହି କାର୍ଯ୍ୟ ସୁଚାରୁ ରୂପେ କରିବା ଲାଗି ସେ ‘ମାତୃ ଶ୍ରୀ ଫାଉଣ୍ଡେସନ’ ଗଠନ କରିଛନ୍ତି। ମୋବାଇଲ୍ କ୍ଲିନିକ୍ରେ ସେବା ଦେୟ ବାବଦରେ କାହାଠାରୁ କିଛି ବି ଗ୍ରହଣ କରନ୍ତିନି। କିନ୍ତୁ ଅନେକେ ତାଙ୍କୁ ବାଧ୍ୟକରି ଅର୍ଥ ଦିଅନ୍ତି। ଡ. ସୁନୀଲ ଏହି ଅର୍ଥ ତଥା ତାଙ୍କ ବନ୍ଧୁ ଓ ଅନ୍ୟମାନଙ୍କ ଦାନରେ ସେବାକୁ ଆଗକୁ ନେଇପାରିଛନ୍ତି। କୋଭିଡ୍ ସମୟରେ ଏହାକୁ ବହୁ ସତର୍କତାର ସହ ଚଳାଇଥିଲେ ମଧ୍ୟ ତଙ୍କ ସାନଭାଇଙ୍କ ମୃତ୍ୟୁ ହେବା ପରେ ଅନେକେ ତାଙ୍କୁ ମୋବାଇଲ୍ ବନ୍ଦ କରିବାକୁ କହିଥିଲେ। ହେଲେ ରୋଗୀମାନଙ୍କ ଫୋନ୍ ପାଇବା ପରେ ସେ ଘରେ ନ ରହି ପୁଣି ରୋଗୀଙ୍କ ପାଖରେ ପହଞ୍ଚିଗଲେ, ଯାହା ଏବେ ପୂର୍ବପରି ଚାଲିଛି।
