ଜଣେ ବ୍ୟକ୍ତି ୮ ହଜାରରୁ ଅଧିକ ଶୁଆଙ୍କୁ ଖାଇବାକୁ ଦେବା ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ଚେନ୍ନାଇର ଜୋଶେଫ ଶେଖରଙ୍କ ଦ୍ୱାରା ଏହା ସମ୍ଭବ ହୋଇଛି। ସବୁଠୁ ବଡ଼କଥା ହେଉଛି, ଜୋଶେଫ ଶୁଆମାନଙ୍କ ଖାଦ୍ୟ ପାଇଁ ତାଙ୍କ ଆୟର ୪୦% ଖର୍ଚ୍ଚ କରୁଛନ୍ତି । ତାଙ୍କର ଏକ ଦୋକାନ ଅଛି। ୨୦୦୪ରେ ତାଙ୍କ ଅଗଣାରେ ୫ଟି ଶୁଆ ବସିଥିତ୍ଲେ ଓ ଭାତ ଖାଇବାକୁ ଚେଷ୍ଟା କରିବା ଲକ୍ଷ୍ୟ କରି ଶେଖର ସେମାନଙ୍କୁ ଭାତ ଖାଇବାକୁ ଦେଇଥିଲେ। ପରେ ସେ ଦୀର୍ଘ ୧୫ ବର୍ଷ ହେବ ବହୁ ଘାତ ପ୍ରତିଘାତ ସହି ଏହା ଚାଲୁ ରଖିଛନ୍ତି। ଶୁଆ ସଂଖ୍ୟା ୫ରୁ ବଢି ଏବେ ୮,୦୦୦ରୁ ଅଧିକ ହୋଇଛି। ଶୁଆମାନେ ଏବେ ତାଙ୍କ ପାଇଁ ‘ଗ୍ରୀନ୍ ଫ୍ରେଣ୍ଡ୍’ ପାଲଟିଯାଇଛନ୍ତି ଓ ତାଙ୍କୁ ଲୋକେ ‘ଚେନ୍ନାଇର ବାର୍ଡମ୍ୟାନ’ ବୋଲି ସମ୍ବୋଧନ କରୁଛନ୍ତି। ଶୁଆମାନେ ପ୍ରତିଦିନ ୭୫ କେ.ଜି. ଭାତ ଖାଉଛନ୍ତି। ଭାତ ଓ ପାଣି ଯୋଗାଇବାରେ ତାଙ୍କ ପରିବାର ଲାଗିପଡ଼ନ୍ତି। କେବଳ ଏତିକି ନୁହେଁ ଶୁଆଙ୍କ ପସନ୍ଦ ଖାଦ୍ୟ ମଧ୍ୟ ବହୁ ସମୟରେ କିଣି ସେମାନଙ୍କୁ ଦିଅନ୍ତି ଜୋଶେଫ। କାଠର ଛୋଟ ଛୋଟ ବାକ୍ସରେ ଶୁଆମାନଙ୍କୁ ଖାଇବାକୁ ଦିଅନ୍ତି। ଦଳ ଦଳ ଶୁଆ ଆସି ସେଥିରୁ ଭାତ ଖାଇ ଉଡ଼ିଯାଆନ୍ତି। ପ୍ରତିଦିନ ସକାଳ ୪ଟାରେ ଉଠି ଜୋଶେଫ ସେଗୁଡ଼ିକୁ ସଫା କରନ୍ତି। ତାଙ୍କର ଏହି କାର୍ଯ୍ୟ ଦେଖିବାକୁ ଦେଶ ବିଦେଶରୁ ବହୁ ପର୍ଯ୍ୟଟକ ତାଙ୍କ ଘରକୁ ଆସୁଛନ୍ତି।
