ଗୋଟିଏ ଲାଇବ୍ରେରିର ଉନ୍ନତି ପାଇଁ ଜଣେ ଲାଇବ୍ରେରିଆନ୍ଙ୍କ ନିଷ୍ଠାପର ପ୍ରୟାସ ସଭିଙ୍କ ପାଇଁ ପ୍ରେରଣା ପାଲଟିଛି। କେରଳର ଆଲ୍ପୁଝା ଜିଲା କାରୁଭଟ୍ଟା ନିବାସୀ ଲାଇବ୍ରେରିଆନ୍ ପି. ସୁକୁମାରନ୍ ପ୍ରତିଦିନ ୧୨ କି.ମି. ଚାଲିଚାଲି ଯାଇ ଲୋକମାନଙ୍କୁ ବହି ଦେଉଛନ୍ତି। ଅତି କମ୍ରେ ୩୫ଟି ଘରେ ସେ ପିଲା ଓ ମହିଳାମାନଙ୍କୁ ବହି ଦେଉଛନ୍ତି ଓ ଠିକ୍ ସମୟରେ ଆଣୁଛନ୍ତି। ଲାଇବ୍ରେରିରୁ ବାହାରିବା ସମୟରେ ସେ ଦୁଇଟି ବ୍ୟାଗରେ ୬୦-୭୦ ଖଣ୍ଡ ବହି ନିଅନ୍ତି। ଏଗୁଡ଼ିକୁ କାରୁଭଟ୍ଟା ଓ କୁମାରପୁରମ୍ ପଞ୍ଚାୟତର ଲୋକଙ୍କ ପାଖରେ ପହଞ୍ଚାଇବା ପରେ ଅପରାହ୍ନ ୪ଟାରେ ଫେରନ୍ତି। ଏଭଳି କାର୍ଯ୍ୟ ସେ ୪୧ ବର୍ଷ ଧରି କରିଆସୁଛନ୍ତି। ୧୯୫୦ରେ ପ୍ରତିଷ୍ଠିତ କୁମାରପୁରମ୍ ପବ୍ଲିକ୍ ଲାଇବ୍ରେରିରେ ସେ ୧୯୭୯ରୁ ଚାକିରି କରୁଛନ୍ତି। ସେତେବେଳେ ଏହି ଲାଇବ୍ରେରିକୁ ପାଠିକାପାଠକ ଆସିବା କମି ଯିବା ଦେଖ ସୁକୁମାରନ୍ ଏଭଳି ଅଭିଯାନ ଆରମ୍ଭ କରିଥିଲେ। ତାଙ୍କର ଏଭଳି ନିଷ୍ଠାପର ଉଦ୍ୟମ ଯୋଗୁ ଲୋକେ ତାଙ୍କୁ ‘ଓ୍ବାକିଂ ଲାଇବ୍ରେରିଆନ’ ବୋଲି ସମ୍ବୋଧନ କରନ୍ତି। ଲୋକ ଓ ପିଲାମାନେ ବହି ପଢ଼ିବା ଦ୍ୱାରା ସେମାନଙ୍କର ଲାଭ ହେବା ସହ ଲାଇବ୍ରେରି ମଧ୍ୟ ବଞ୍ଚି ରହିବ ଓ ଏହି ସଂସ୍କୃତିର ବିକାଶ ହୋଇପାରିବ ବୋଲି କହନ୍ତି ୬୧ ବର୍ଷୀୟ ସୁକୁମାରନ୍। ଏହି ଲାଇବ୍ରେରିରେ ପାଖାପାଖି ୨୦,୦୦୦ ବହି ଅଛି।
