ମନୋଜ ପଟେଲ ପେସାରେ ଜଣେ କୃଷକ। ମଧ୍ୟପ୍ରଦେଶର ଦେବାସରେ ରହନ୍ତି। କୃଷି ସହ ଜଡ଼ିତ ରହି ମଧ୍ୟ ସଡ଼କ ଦୁର୍ଘଟଣାର ଶିକାର ହୋଇଥିବା ୧୫୦ରୁ ଊର୍ଦ୍ଧ୍ୱ ଲୋକଙ୍କ ଜୀବନ ବଞ୍ଚାଇପାରିଛନ୍ତି। ଆଖିଠାରୁ ଆରମ୍ଭ କରି କିଡ୍ନୀ ଯାଏ ଦାନ କରିବାର ବ୍ୟବସ୍ଥା ମଧ୍ୟ କରିଛନ୍ତି। ଏହାବ୍ୟତୀତ ୧୧ ହଜାରରୁ ଊର୍ଦ୍ଧ୍ୱ ଶିଶୁଙ୍କ ଚିକିତ୍ସା ମାଗଣାରେ କରାଇବାରେ ସାହାଯ୍ୟ କରିଛନ୍ତି। ‘ଅରେଞ୍ଜେସ୍ ’ ଏନ୍ଜିଓ ଦ୍ୱାରା ଏହି କାର୍ଯ୍ୟ ସୁରୁଖୁରୁରେ ଚଳାଉଛନ୍ତି। ସରକାରୀ ହସ୍ପିଟାଲରେ ସେ ଏକ ପାଳନ ଗୃହ ସ୍ଥାପନ କରିଛନ୍ତି। ଜନ୍ମ ପରେ ପିଲାଙ୍କୁ ପରିତ୍ୟକ୍ତ ସ୍ଥାନରେ ନ ଛାଡ଼ି ଯେଉଁମାନେ ସେଠାରେ ଛାଡୁଛନ୍ତି, ମନୋଜ ସେମାନଙ୍କୁ ସରକାରଙ୍କୁ ହସ୍ତାନ୍ତର କରୁଛନ୍ତି। ସେ ଏପର୍ଯ୍ୟନ୍ତ ଏଭଳି ୬ ଶିଶୁଙ୍କ ଜୀବନ ବଞ୍ଚାଇବାରେ ସକ୍ଷମ ହୋଇଛନ୍ତି। ମନୋଜ ମଧ୍ୟ ଅନେକ ହଜାର ଦିବ୍ୟାଙ୍ଗ ପିଲାଙ୍କୁ ସମାଜର ମୁଖ୍ୟ ସ୍ରୋତରେ ସାମିଲ କରିଛନ୍ତି। ସଡ଼କ ଦୁର୍ଘଟଣାଗ୍ରସ୍ତଙ୍କୁ ଚିକିତ୍ସାରେ ସାହାଯ୍ୟ କରିବା କାର୍ଯ୍ୟ ସେ ୧୨ ବର୍ଷ ପୂର୍ବେ ପ୍ରଥମେ ଆରମ୍ଭ କରିଥିଲେ। ସୋସିଆଲ ମିଡିଆରେ ତାଙ୍କ କାହାଣୀ ଶେୟାର କରିବା ପରେ ଏବେ ତାଙ୍କ ସହ ୧୫୦ ଜଣ ଲୋକ ଯୋଡ଼ି ହୋଇଛନ୍ତି ଓ ଏହି ଟିମ୍କୁ ସେ ହ୍ବାଟ୍ସଆପ୍ ଗ୍ରୁପ ମାଧ୍ୟମରେ ଚଳାଉଛନ୍ତି। ଆଖପାଖ ଅଞ୍ଚଳରେ ତାଙ୍କ ଫୋନ୍ ନମ୍ବର ସମସ୍ତେ ଜାଣନ୍ତି। ବହୁ ସମୟରେ ସାହାଯ୍ୟ ପାଇଁ ତାଙ୍କ ପାଖକୁ କଲ୍ ଆସେ ଓ ସେ ଆମ୍ବୁଲାମ୍ସ ଏବଂ ପୋଲିସକୁ ତୁରନ୍ତ ଖବର ଦେଇଥାଆନ୍ତି। ସଡ଼କ ଦୁର୍ଘଟଣାଗ୍ରସ୍ତ ଲୋକଙ୍କୁ ହସ୍ପିଟାଲରେ ପହଞ୍ଚାଇବା ଲାଗି ସେ ତାଙ୍କ ଗାଡ଼ିକୁ ମଧ୍ୟ ଆମ୍ବୁଲାନ୍ସ ରୂପ ଦେଇଛନ୍ତି।
