ଗୋଷ୍ଠୀଗତ ପ୍ରୟାସ କିଭଳି ଭୋକିଲାଙ୍କ ପେଟ ଭରିପାରେ ତାହାର ଦୃଷ୍ଟାନ୍ତ ଦେଖିବାକୁ ମିଳିଛି ପୁଣେରେ। ସ୍ନେହାଜ ଚଓ୍ବାଲଙ୍କ ନେତୃତ୍ୱରେ ତାଙ୍କର ୬ ଜଣ ସାଙ୍ଗ ପୁଣେରେ ୨ଟି କମ୍ୟୁନିଟ୍ କିଚେନ ଚଳାଉଛନ୍ତି। ଏଠାରେ ପ୍ରତିଦିନ ସହରର ୪୦୦ ଭୋକିଲା ଲୋକଙ୍କୁ ଖାଇବାକୁ ଦିଆଯାଉଛି। କେବଳ ଏତିକି ନୁହେଁ ଅସହାୟ ମହିଳାମାନଙ୍କୁ ସଶକ୍ତ କରିବା ଲାଗି ବିଭିନ୍ନ ଧନ୍ଦାମୂଳକ ପ୍ରଶିକ୍ଷଣ ଦେଉଛନ୍ତି। ଏବେସୁଦ୍ଧା ୨୫୦ ଜଣ ମହିଳା ସେମାନଙ୍କ ଦ୍ୱାରା ରୋଜଗାରକ୍ଷମ ହୋଇସାରିଲେଣି। ମାସକୁ ୧୨,୦୦୦ ଲୋକଙ୍କୁ ରୋଜଗାର ଦେବା ଓ ଏସବୁ ଉନ୍ନତିମୂଳକ କାର୍ଯ୍ୟ ଲାଗି ସେମାନେ ଗୋଲ୍ଡେନ୍ ହାର୍ଟ ଫାଉଣ୍ଡେସନ ଗଠନ କରିଛନ୍ତି। ଏସବୁ ବାବଦ ଖର୍ଚ୍ଚ ସେମାନେ ଦାନ ଆକାରରେ ପାଉଥିବା ଅର୍ଥରେ ଚଳାଉଛନ୍ତି। ସେମାନେ ମଧ୍ୟ ବିଭିନ୍ନ ପେସାରେ ରହି ସେମାନଙ୍କ ଆୟକୁ ଏଥିରେ ଲଗାଉଛନ୍ତି। ୨୦୧୭ରୁ ଆରମ୍ଭ କରାଯାଇଥିବା କମ୍ୟୁନିଟି କିଚେନ୍ ସକାଳ ୬ଟାରୁ ଆରମ୍ଭ ହୋଇ ସନ୍ଧ୍ୟା ୬ଟା ଯାଏ ଖୋଲା ରହୁଛି। ଲୋକମାନେ ଆସି ସେଠାରେ ଲଞ୍ଚ କରୁଛନ୍ତି ଓ ଆବଶ୍ୟକସ୍ଥଳେ ଅତି ଅସହାୟକଙ୍କ ପାଇଁ ଡିନର ପ୍ୟାକ୍ କରି ସେମାନଙ୍କୁ ଦିଆଯାଉଛି। ୭ ଜଣରେ ଆରମ୍ଭ କରାଯାଇଥିବା ‘ଗୋଲ୍ଡେନ୍ ହାର୍ଟ ଫାଉଣ୍ଡେସନ’ରେ ଏବେ ଅନେକ ମହିଳା ସାମିଲ ହୋଇଛନ୍ତି ଓ ସେମାନେ ମାସକୁ ୨ ଲକ୍ଷ ଟଙ୍କା ସଂଗ୍ରହ କରିପାରୁଛନ୍ତି। ସାମୂହିକ ଉଦ୍ୟମ ଓ ଦୃଢ଼ ଇଚ୍ଛାଶକ୍ତି ବଳରେ ସମାଜର ଦୁର୍ବଳ ଶ୍ରେଣୀ ଲୋକଙ୍କ ଜୀବନରେ ହସ ଖେଳାଇବା ସମ୍ଭବ ବୋଲି କହନ୍ତି ଫାଉଣ୍ଡେଶନର ସଭାପତି ସ୍ନେହାଜ।
