ଦୁଃଖରେ ପଡ଼ିଲେ ମଣିଷ ଅନ୍ୟଠାରୁ ସହଯୋଗ ମାଗେ କିନ୍ତୁ ଅସହାୟ ପ୍ରାଣୀ ତାହା କରିପାରନ୍ତି ନାହିଁ। ସେମାନଙ୍କ ପାଖରେ କେହି ଜଣେ ପହଞ୍ଚି ସେମାନଙ୍କ ଦୁଃଖ ଓ ଯନ୍ତ୍ରଣା ଦୂର କରିଥାଏ, ଯାହା କରୁଛନ୍ତି ନମ୍ରତା ହଖୁ ଓ ତାଙ୍କ ପରିବାର। ଜମ୍ମୁର ଏହି ପରିବାର ରୋଗଗ୍ରସ୍ତ ଓ ଆହତ ପ୍ରାଣୀଙ୍କୁ ଉଦ୍ଧାର କରି ସେମାନଙ୍କ ସେବା କରୁଛନ୍ତି। ୨୮ ବର୍ଷ ହେବ ସେମାନେ ଏହା କରି ଆସୁଛନ୍ତି। କଶ୍ମୀର ଛାଡ଼ି ହଖୁ ପରିବାର ଜମ୍ମୁୁରେ ରହିବା ପରେ ତାଙ୍କ ଘରକୁ ପ୍ରାଣୀଙ୍କ ଆଶ୍ରୟସ୍ଥଳ କରିଦେଇଛନ୍ତି। ୧୯୯୩ରୁ ୨୦୧୮ ଯାଏ ପ୍ରାଣୀଙ୍କର ଚିକିତ୍ସା ଓ ଖାଦ୍ୟ ବାବଦ ସବୁ ଖର୍ଚ୍ଚ ବହନ କରିବା ପରେ ଏକ ଟ୍ରଷ୍ଟ ଗଠନ କରି ଅନ୍ୟମାନଙ୍କ ସାହାଯ୍ୟ ଲୋଡ଼ିଛନ୍ତି। ୪୦ ବର୍ଷୀୟା ନମ୍ରତା ହଖୁ ତାଙ୍କ ମାତା ଓ ପିତାଙ୍କ ଏହି କାର୍ଯ୍ୟରେ ଲାଗିପଡ଼ିଛନ୍ତି। ନମ୍ରତା ଏକ କମ୍ପ୍ୟୁଟର ସେଣ୍ଟରରେ କାର୍ଯ୍ୟ କରୁଥିଲେ, ହେଲେ ପ୍ରାଣୀଙ୍କ ଯନତ୍ ପାଇଁ ସେ ତାହାକୁ ଛାଡ଼ି ଦେଇଛନ୍ତି। ପ୍ରାଣୀଙ୍କ ସେବା କରିବା ସକାଶେ ସେ ବିବାହ କରିନାହାନ୍ତି। ଜମ୍ମୁ ଆସିବା ପରେ ନମ୍ରତାଙ୍କ ମାତାପିତା ପ୍ରଥମେ ରାସ୍ତାରୁ ଆହତ କୁକୁରଙ୍କୁ ଉଦ୍ଧାର କରିବା ଆରମ୍ଭ କରିଦେଇଥିଲେ। ଏବେ ତାଙ୍କ ପାଖରେ ୩୪୦ଟି କୁକୁର, ମୃଗ, ବିଲେଇ, ଚିଲ, ମାଙ୍କଡ଼ ରହିଛନ୍ତି। ଏମାନଙ୍କ ମଧ୍ୟରୁ ୫୦ କୁକୁର ଆଦୌ ଚାଲିପାରୁନାହାନ୍ତି। ହଖୁ ପରିବାର ପ୍ରତି ମାସରେ ମାଇଗ୍ରେଣ୍ଟ ରିଲିଫ୍ ଫଣ୍ଡ୍ରୁ ପାଖାପାଖି ୧୦,୦୦୦ ଟଙ୍କା ପାଉଛନ୍ତି। ତେବେ ପ୍ରାଣୀଙ୍କ ପାଇଁ ଅର୍ଥାଭାବ ପଡ଼ୁଛି। ଫଳରେ ନମ୍ରତା ତାଙ୍କ ମାଆ ଗହଣା ବିକ୍ରି କରିଦେଇଛନ୍ତି। ଏହାସହ ଲକ୍ଷାଧିକ ଟଙ୍କା ଋଣ କରିଛନ୍ତି।
