ନିର୍ବାଚନରେ ନେତାମାନେ ବିହନ, ସାର, ପାଣି ସୁବିଧା ଯୋଗାଇ ଦେବାର ପ୍ରତିଶ୍ରୁତି ଦେଉଥିବା କଥା ସମସ୍ତେ ଜାଣନ୍ତି। ହେଲେ ରାତିଦିନ ଫସଲ ଜଗିବା ପ୍ରତିଶ୍ରୁତି ଦେଇ ନିର୍ବାଚନ ଜିତିବା କେବେ ଶୁଣିଛନ୍ତି କି। ବିହାରର ମୁଜାଫର୍ନଗର ଜିଲା ଚୌତରବା ଥାନା ଅଧୀନ ପତିଲର ପଞ୍ଚାୟତରେ ଦେଖିତ୍ବାକୁ ମିଳେ ଏମିତିକା ଘଟଣା। ଉକ୍ତ ପଞ୍ଚାୟତରେ ସବୁବେଳେ ଫସଲ ସୁରକ୍ଷାକୁ କେନ୍ଦ୍ରକରି ରାଜନୀତି ଜୋର୍ ଧରିଥାଏ ଓ ନିର୍ବାଚନ ହୋଇଥାଏ। ଏଠାରେ ନିର୍ବାଚିତ ପ୍ରତିନିଧି ଲୋକଙ୍କ ଫସଲ ଜଗିବା ଦାୟିତ୍ୱ ନିର୍ବାହ କରିଥାଆନ୍ତି। ଏହି ଧାରା ସ୍ବାଧୀନତା ପରଠାରୁ ଲାଗି ରହିଛି ଓ ନିର୍ବାଚିତ ୭ ଜଣ ସରପଞ୍ଚଙ୍କ ମଧ୍ୟରୁ ୫ ଜଣ ଫସଲ ସୁରକ୍ଷାକୁ ନେଇ ନିର୍ବାଚିତ ହୋଇସାରିଲେଣି। ଏଥର ଚତୁର୍ଥ ପର୍ଯ୍ୟାୟରେ ଅନୁଷ୍ଠିତ ନିର୍ବାଚନରେ ଉକ୍ତ ପଞ୍ଚାୟତରେ ସରପଞ୍ଚ ପ୍ରାର୍ଥୀ ଲାଲମତୀ ଦେବୀ ଫସଲ ସୁରକ୍ଷାକୁ ମୁଖ୍ୟ ପ୍ରସଙ୍ଗ କରିଥିଲେ। ନିର୍ବାଚନରେ ଜିତିଲେ ସେ ଓ ତାଙ୍କ ସ୍ବାମୀ ମିଶିି ଦିନରାତି ଫସଲ ଜଗିବେ ବୋଲି ପ୍ରତିଶ୍ରୁତି ଦେଇଥିଲେ। ଫଳରେ ଲାଲମତୀ ଜିତିଗଲେ। ଜିତିବା ପରେ ତାଙ୍କ ସ୍ବାମୀ ପଞ୍ଚାୟତ ସହଯୋଗରେ ଗ୍ରାମବାସୀଙ୍କୁ ନେଇ କମିଟି ଗଠନ କରି ଦିନରାତି ଫସଲ ଜଗିବାରେ ଲାଗିଗଲେଣି। ଏହି ପଞ୍ଚାୟତର ଗାଁଗୁୁଡ଼ିକରେ ଲୋକେ ରାତିରେ ଅନ୍ୟର ଫସଲ କାଟିନେଇ ପଶୁଙ୍କୁ ଖାଇବାକୁ ଦେଇ ଦିଅନ୍ତି। ଏହାକୁ ନେଇ ବହୁ ସମୟରେ ଝଗଡ଼ା ହୁଏ ଏବଂ ମାମଲା ଥାନା ଓ କୋର୍ଟରେ ପହଞ୍ଚିଯାଏ। ଏଣୁ ଏହାକୁ ରୋକିବାରେ ଯିଏ ସଫଳ ହେବ ବୋଲି ଲୋକ ହୃଦ୍ବୋଧ କରନ୍ତି ତାଙ୍କୁ ହିଁ ଭୋଟ ଦେଇ ଜିତାଇଥାଆନ୍ତି।
