ପେନ୍ସନ ଟଙ୍କାରେ ରାସ୍ତା ଖାଲଖମା ପୂରଣ କରି ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛନ୍ତି ହାଇଦ୍ରାବାଦର ଗଙ୍ଗାଧର ତିଳକ କଟନାମ୍। ସେ ପ୍ରତିଦିନ ସକାଳେ ତାଙ୍କ କାର୍ ଧରି ହାଇଦ୍ରାବାଦର ରାସ୍ତାଗୁଡ଼ିକରେ ଘୂରିବୁଲନ୍ତି ଓ ଯେଉଁଠାରେ ଗର୍ତ୍ତ ଥାଏ ତାହାକୁ ପୂରଣ କରନ୍ତି। ଗଙ୍ଗାଧର ପ୍ରତିଦିନ ତେଲ ବାବଦରେ ବି ୫୦୦ ଟଙ୍କା ଖର୍ଚ୍ଚ କରୁଛନ୍ତି। କାର୍ ପଛସିଟ୍ରେ ସେ ପ୍ରାୟ ୮ରୁ ୧୦ ଅଖା ଗୋଡି, ବଜୁରି ରଖନ୍ତି। ସେ ଏସବୁ ଠିକାଦାରଙ୍କଠାରୁ କିଣନ୍ତି। ଏବେ ସୁଦ୍ଧା ଗଙ୍ଗାଧର ୧,୧୦୦ ଗର୍ତ୍ତ ମରାମତି କରିସାରିଲେଣି। ଗଙ୍ଗାଧରଙ୍କ ବୟସ ୬୭। ସେ ରେଲଓ୍ବେରେ ଚାକିରି କରିଥିଲେ। ଚାକିରି ସମୟରେ ବି ଲଞ୍ଚ୍ ବେଳେ ସେ ଅଫିସରୁ ଗର୍ତ୍ତ ମରାମତି କରିବାକୁ ବାହାରି ଯାଉଥିଲେ। ଅବସର ନେବା ପରେ ସେହି କାର୍ଯ୍ୟ ଜାରି ରଖିଛନ୍ତିି ଓ ଏଥିରେ ତାଙ୍କ ପେନ୍ସନ ଟଙ୍କା ଖର୍ଚ୍ଚ କରୁଛନ୍ତି। ଏବେ ଗଙ୍ଗାଧରଙ୍କ ସହ ହାଇଦ୍ରାବାଦର ବହୁ ଇଞ୍ଜିନିୟର ଓ ସାଧାରଣ ଲୋକ ଯୋଗ ଦେଇଛନ୍ତି। ଏହି କାର୍ଯ୍ୟ ପାଇଁ ତାଙ୍କୁ ଗ୍ରେଟର ହାଇଦ୍ରାବାଦ ମ୍ୟୁନିସିପାଲ କର୍ପୋରେଶନ ମଧ୍ୟ ସହଯୋଗ କରୁଛି ଓ ଆବଶ୍ୟକ ଜିନିଷ ମଧ୍ୟ ଯୋଗାଇ ଦେଉଛି।
