ଘର ଅଗଣାଠାରୁ ଛାତ, ଯୁଆଡ଼େ ଚାହିଁବ ପରିବା ଓ ଫୁଲ। ଏମିତି ଏକ ଅର୍ବାନ ଗାର୍ଡେନ୍ ବା ସହରୀ ବଗିଚା କରିଛନ୍ତି ବିହାର ରାଜ୍ୟ ଔରଙ୍ଗାବାଦର ଗଣେଶ କୁଲ୍କର୍ଣ୍ଣି। ପେସାରେ ସେ ଜଣେ ଲାଇବ୍ରେରିଆନ। ସେ ତାଙ୍କ ଘରେ ୪୦୦ କୁଣ୍ଡରେ ଏହି ବଗିଚା କରିଛନ୍ତି। ସେଥିରେ ୨୦୦ ପ୍ରକାର ପରିବା ଫଳାଉଛନ୍ତି। ୮୦୦ ବର୍ଗଫୁଟ ଅଗଣା ଓ ଛାତରେ ୫ ପ୍ରକାର ଲାଉ, ଟମାଟୋ, କଖାରୁ, ପୋଇ, ଲଙ୍କା, ଅଦାଠାରୁ ଆରମ୍ଭ କରି ପିଆଜ, ରସୁଣ, କୋବି ଆଦି ଚାଷ କରିଥାଆନ୍ତି। ପ୍ରତି ୧୫ ଦିନରେ ବିଭିନ୍ନ ପ୍ରକାର ପରିବା ଗଛ ଲଗାନ୍ତି। ବଗିଚାରୁ ଯାହା ପରିବା ମିଳେ, ତାହା ୪ଟି ପରିବାରର ଆବଶ୍ୟକତା ପୂରଣ କରିବାକୁ ଯଥେଷ୍ଟ ବୋଲି କହନ୍ତି ଗଣେଶ। ସେ ପ୍ରୋ-ବ୍ୟାଗ୍ ବ୍ୟତୀତ ସ୍ଥାୟୀ କୁଣ୍ଡ ବ୍ୟବହାର କରୁଛନ୍ତି। ପାଚେରି ଓ ଘର କାନ୍ଥରେ ବି କୁଣ୍ଡ କରିଛନ୍ତି। ନିଜେ ଜିଆଖତ ପ୍ରସ୍ତୁତ କରି ଏଥିରେ ଉପଯୋଗ କରୁଛନ୍ତି। ଅଗଣାରେ ବଗିଚା କରି ପରିବା ଚାଷ ସହ ଲୋକମାନଙ୍କୁ ହ୍ବାଟ୍ସଆପ୍ ଗ୍ରୁପ୍ ମାଧ୍ୟମରେ ଯୋଡୁଛନ୍ତି। ୧୦ ଗ୍ରୁପ୍ରେ ଏବେ ୧,୫୦୦ ଲୋକ ଯୋଡ଼ିହୋଇ ଏଭଳି ବଗିଚା କରିଛନ୍ତି। ଗଣେଶ ମଧ୍ୟ ‘ଗ୍ରୀନ୍ ଟ୍ରଷ୍ଟ’ ଏନ୍ଜିଓ ଗଠନ କରି ବିଭିନ୍ନ ଶିକ୍ଷାନୁଷ୍ଠାନରେ ବୃକ୍ଷରୋପଣ କାର୍ଯ୍ୟକ୍ରମ ଚଳାଇଛନ୍ତି। ସ୍ବେଚ୍ଛାସେବୀଙ୍କ ସହାୟତାରେ ଏବେ ସୁଦ୍ଧା ସେ ବିଭିନ୍ନ କଲେଜ ହତାରେ ୧୫୦୦ ଚାରା ରୋପଣ କରିସାରିଲେଣି। ଏହି ଅଭିଯାନ ଔରଙ୍ଗାବାଦ ବ୍ୟତୀତ ଅନ୍ୟ ସହରକୁ ସମ୍ପ୍ରସାରଣ କରିବାକୁ ଗଣେଶ ଯୋଜନା କରିଛନ୍ତି।
