ବନବିଭାଗର ଜଣେ ଉଚ୍ଚ ପଦାଧିକାରୀଙ୍କ ନିଷ୍ଠାପର କାର୍ଯ୍ୟ କିଭଳି ପରିବେଶ ଓ ଜୀବଜଗତ ଲାଗି ଉପଯୋଗୀ ହୋଇପାରେ ତାହାର ଉଦାହରଣ ଦେଖିବାକୁ ମିଳିଛି ଉତ୍ତରାଖଣ୍ଡରେ। ରୁଦ୍ରପ୍ରୟାଗରେ ଡିଏଫ୍ଓ ଭାବେ କାର୍ଯ୍ୟରତ ଆଇଏଫ୍ଏସ୍ ଅଧିକାରୀ ବୈଭବ ସିଂ ବର୍ଷାଜଳ ସଂରକ୍ଷଣ ଦିଗରେ ଉଲ୍ଲେଖନୀୟ ଭୂମିକା ଗ୍ରହଣ କରୁଛନ୍ତି। ୨୦୧୫ରେ ଦାୟିତ୍ୱ ନେବା ପରେ ଏବେ ସୁଦ୍ଧା ସେ ୧ କୋଟି ଲିଟର ବର୍ଷାଜଳ ସଂରକ୍ଷଣ କରି ବନାଗ୍ନିରୁ ହିମାଳୟର ୪୦୦ ହେକ୍ଟର ବନସମ୍ପଦକୁ ରକ୍ଷା କରିବା ସହ ଜଙ୍ଗଲ ଓ ବନବାସୀଙ୍କ ଜୀବନ ଜୀବିକାରେ ପରିବର୍ତ୍ତନ ଆଣିବାରେ ସକ୍ଷମ ହୋଇପାରିଛନ୍ତି। ଜଳ ସଂରକ୍ଷଣ ପାଇଁ ବୈଭବ ଓ ତାଙ୍କ ବନଖଣ୍ଡର କର୍ମଚାରୀମାନେ ୬୧୨ଟି ଖାଲ ବା ଗାଡ଼ିଆ ଖୋଳିିଛନ୍ତି। ପ୍ରତ୍ୟେକଟିର ଜଳଧାରଣ କ୍ଷମତା ୧୦,୦୦୦ ଲିଟରରୁ ୨,୫୦,୦୦୦ ଲିଟର ମଧ୍ୟରେ ରହିଛି। ସମୁଦ୍ର ପତ୍ତନଠାରୁ ୧ରୁ ୨ ହଜାର ମିଟର ଉଚ୍ଚରେ ସଞ୍ଚିତ ଏହି ପାଣିକୁ ସେ ବିଭିନ୍ନ ପ୍ରୋଜେକ୍ଟ ମାଧ୍ୟମରେ ଲୋକଙ୍କୁ ଯୋଗାଇ ଦେବାରେ ବାଟ ଦେଖାଇଛନ୍ତି। ସଂରକ୍ଷିତ ଜଳକୁ ନେଇ ଉତ୍ତରାଖଣ୍ଡ ସରକାର ପ୍ରାୟ ଛୋଟବଡ଼ ୭୦ଟି ଓ୍ବାଟର ପ୍ରୋଜେକ୍ଟ କାର୍ଯ୍ୟକାରୀ କରୁଛନ୍ତି। କେବଳ ଏତିକି ନୁହେଁ ବନାଞ୍ଚଳରେ ଏକ ପ୍ରକାର ଘାସ ରୋପଣ କରି ମୃତ୍ତିକା କ୍ଷୟ ରୋକିବାରେ ସେ ସଫଳ ହୋଇଛନ୍ତି।
