ପିଲାଦିନ ଭଲରେ କଟିଗଲା ମିନାଲ ସିଂଘଭୀଙ୍କର। ତାଙ୍କୁ ଯେତେବେଳେ ବୟସ ୨୮ ସେତେବେଳେ ତାଙ୍କ ଜୀବନରେ ସବୁ କିଛି ଓଲଟପାଲଟ ହୋଇଗଲା। ସେ ଦୃଷ୍ଟିଶକ୍ତି ହରାଇ ବସିଲେ। ତା’ପରେ ଆରମ୍ଭ କଲେ ରେଡିଓ ଉଡ଼ାନ। ଏହି ଅନ୍ଲାଇନ ରେଡିଓର ଏବେ ୪୫,୦୦୦ ଭିନ୍ନକ୍ଷମ ଶ୍ରୋତା ରହିଛନ୍ତି। କେବଳ ଭାରତ ନୁହେଁ, ସାରା ବିଶ୍ୱର ୧୧୯ଟି ଦେଶରେ ଏହି ଶ୍ରୋତାମାନେ ମିନାଲଙ୍କ ଦ୍ୱାରା ପରିଚାଳିତ କମ୍ୟୁନିଟି ପ୍ରୋଗ୍ରାମଗୁଡ଼ିକରେ ଅଂଶଗ୍ରହଣ କରୁଛନ୍ତି ଓ ପରସ୍ପରକୁ ସହଯୋଗର ହାତ ବଢ଼ାଉଛନ୍ତି। ଏହି ପ୍ରୋଗ୍ରାମଗୁଡ଼ିକ ଓ୍ବେବ୍ସାଇଟ୍, ମୋବାଇଲ ଆପ୍, ଆଲେକ୍ସ ଏବଂ ଗୁଗଲ ହୋମ୍ରେ ଉପଲବ୍ଧ ହେଉଛି। ଏହାର ବିଷୟବସ୍ତୁ ହିନ୍ଦୀ, ଇଂଲିଶ, ତେଲୁଗୁ ଏବଂ କନ୍ନଡ ଭାଷାରେ କରାଯାଉଛି। ହାଇଦ୍ରାବାଦ ବାସିନ୍ଦା ମିନାଲ ଦୃଷ୍ଟିଶକ୍ତି ହରାଇବା ପରେ ୨୦୧୩ରେ ନିଜ ପ୍ରଚେଷ୍ଟାରେ ଡେପୁଟି କମିଶନର ଅଫିସରେ ଜୁନିୟର ଆସିଷ୍ଟାଣ୍ଟ ଭାବେ ଚାକିରି ପାଇବାକୁ ସକ୍ଷମ ହେଲେ। ୨୦୧୭ରେ ଫେସ୍ବୁକରୁ ଅନ୍ଲାଇନ ରେଡିଓ ସମ୍ପର୍କରେ ଜାଣିବା ପରେ ସେ ରେଡିଓ ଉଡ଼ାନ ଆରମ୍ଭ କରିଥିଲେ । ତାଙ୍କ ସହ ଯୋଡ଼ି ହୋଇଥିବା ଭିନ୍ନକ୍ଷମମାନଙ୍କ ମଧ୍ୟରୁ ୧୦,୦୦୦ ବିବାହ କରିସାରିଛନ୍ତି , ଅନେକେ ଚାକିରି ପାଇଛନ୍ତି, ଅନେକେ କମ୍ପ୍ୟୁଟର ସ୍କିଲ୍ ଶିକ୍ଷା କରିଛନ୍ତି । କିଏ ଗାୟକ ତ କିଏ ଚିତ୍ରକର ହେବା ଲାଗି ରେଡିଓ ଉଡ଼ାନରୁ ବିଭିନ୍ନ କୌଶଳ ଶିକ୍ଷା କରିପାରିଛନ୍ତି। ୪୩ ବର୍ଷୀୟା ମିନାଲ ତାଙ୍କ ଡ୍ୟୁଟି ପରେ ସମୟ ବାହାର କରି ଏହି କାର୍ଯ୍ୟ କରୁଛନ୍ତି।
