ଚେନ୍ନାଇ ପେରୁଙ୍ଗୁଡ଼ିର ସିରାଜ ଖାନ୍ ଜଣେ ଶିକ୍ଷୟିତ୍ରୀ। ସେ ତାଙ୍କ କର୍ମମୟ ଜୀବନରୁ ସମୟ ବଞ୍ଚାଇ ମହିଳାମାନଙ୍କୁ ସ୍ବାବଲମ୍ବୀ କରିବାରେ ଲାଗିଛନ୍ତି। ଏହା କୌଣସି ସରକାରୀ ସହଯୋଗରେ ନୁହେଁ, ବରଂ ସେ ନିଜସ୍ବ ଉଦ୍ୟମରେ ଏହି କାର୍ଯ୍ୟ କରୁଛନ୍ତି। ସିରାଜ ବି.ଏଡ୍ ପାସ୍ କରିବା ପରେ ଶିକ୍ଷୟିତ୍ରୀ ଭାବେ କାର୍ଯ୍ୟ କରୁଛନ୍ତି। ସେ ମଧ୍ୟ ଜଣେ ସିଙ୍ଗଲ ମଦର। ସିରାଜ ‘ଥାଲିର ଲିଡ୍’ ସଂସ୍ଥା ଗଠନ କରି ତା’ ମାଧ୍ୟମରେ ଏହି ସଞ୍ଚାଳନ କରୁଛନ୍ତି। ଏହି ସଙ୍ଗଠନ ସେ ୨୦୨୦ରେ ଆରମ୍ଭ କରିଥିଲେ। ଏବେ ସୁଦ୍ଧା ସେ ୧୦୦ରୁ ଊର୍ଦ୍ଧ୍ୱ ମହିଳାଙ୍କୁ ସ୍ବାବଲମ୍ବୀ କରିସାରିଲେଣି। ସେମାନେ ମାସକୁ ପାଖାପାଖି ୨୦,୦୦୦ ଟଙ୍କା ରୋଜଗାର କରିବାକୁ ସକ୍ଷମ ହୋଇପାରିଛନ୍ତି। ସେ ମହିଳାଙ୍କ ପାଇଁ ଏକ ପ୍ରଶିକ୍ଷଣ କେନ୍ଦ୍ର ଖୋଲିିଛନ୍ତି। ପିଲାଙ୍କୁ ପଢ଼ାଇବା ପରେ ସିରାଜ ସଂନ୍ଧ୍ୟା ସମୟରେ କେନ୍ଦ୍ରକୁ ଆସି ମହିଳାଙ୍କୁ ହାତବୁଣା କୌଶଳ ସମ୍ପର୍କରେ ପ୍ରଶିକ୍ଷଣ ଦେଉଛନ୍ତି। ସେଠାରେ ମହିଳାମାନେ ଆକର୍ଷଣୀୟ ପ୍ଲାଷ୍ଟିକ୍ ବ୍ୟାଗ୍ ବୁଣୁଛନ୍ତି। ବଡ଼ କଥା ହେଉଛି, ଏହି ମହିଳାଙ୍କ ମଧ୍ୟରୁ ଅନେକେ ଘରକାମ କିମ୍ବା ଅନ୍ୟ କୌଣସି କ୍ଷେତ୍ରରେ କାର୍ଯ୍ୟ କରିସାରିବା ପରେ ଅପରାହ୍ନରେ ଆସି ବ୍ୟାଗ୍ ବୁଣୁଛନ୍ତି ଓ ଏଥିରୁ ସେମାନେ ଅଧିକ ରୋଜଗାର କରୁଛନ୍ତି। ସିରାଜ ମହିଳାଙ୍କୁ ରୋଜଗାର ଦେବା ସହ ସାମାଜିକ ସ୍ତରରେ ସମସ୍ତ ପ୍ରକାର ସହଯୋଗ କରିଆସୁଛନ୍ତି। ମହିଳାମାନେ ପ୍ରସ୍ତୁତ କରୁଥିବା ବ୍ୟାଗ୍ର ମୂଲ୍ୟ ୫୦୦ରୁ ୩,୦୦୦ ଟଙ୍କା ରଖାଯାଇଛି। ଏହି ବ୍ୟାଗ୍ଗୁଡ଼ିକୁ ବିକ୍ରି କରିବା ପାଇଁ ମହିଳାମାନେ ବିଭିନ୍ନ ପ୍ରଦର୍ଶନୀକୁ ନେଉଛନ୍ତି ଏବଂ ସେସବୁ ଲୋକଙ୍କ ଦ୍ୱାରା ଆଦୃତ ହେଉଛି।
