ଟ୍ରେନ୍ରେ ଏକ ଭ୍ରାମ୍ୟମାଣ ହସ୍ପିଟାଲ ବିଭିନ୍ନ ଷ୍ଟେଶନକୁ ଯାଇ ରୋଗୀଙ୍କ ଚିକିତ୍ସା କରୁଛି। ଏହା ମହାରାଷ୍ଟ୍ରର ଭୁଶାଓ୍ବାଲ ରେଲଓ୍ବେ ଡିଭିଜନର ଚେଷ୍ଟା ଯୋଗୁ ସମ୍ଭବ ହୋଇଛି। ଜାନୁଆରୀ ୨୦୨୫ରେ ଏହି ହସ୍ପିଟାଲ ଆରମ୍ଭ କରାଯାଇଥିଲା। ଏହା ଏକ ପୁରୁଣା ଡବାରେ ଚାଲିଛି ଓ ଏହାର ନାମ ରଖାଯାଇଛି ରୁଦ୍ର । ଭୁଶାଓ୍ବାଲ ଡିଭିଜନର ସବୁ ଷ୍ଟେଶନକୁ ଯାଇ ସେଠାରେ ଏହି ହସ୍ପିଟାଲ ରହୁଛି। ଫଳରେ ସେଠାକାର ରେଲଓ୍ବେ କର୍ମଚାରୀ ଓ ସେମାନଙ୍କ ପରିବାର ସହଜରେ ଚିକିତ୍ସା ସୁବିଧା ପାଇପାରୁଛନ୍ତି। ଭୁଶାଓ୍ବାଲ ଡିଭିଜନ କ୍ଷେତ୍ର ୧,୨୦୦ କିଲୋମିଟର ଏବଂ ପ୍ରତିଦିନ ଏହି ଡିଭିଜନରେ ୨୨୫ ଯାତ୍ରୀବାହୀ ଟ୍ରେନ୍ ଚାଲୁଛି। ରୁଦ୍ର ହସ୍ପିଟାଲ ଏବେ ଏହି ସବୁ ଟ୍ରେନ୍ ଦ୍ୱାରା ଡିଭିଜନର ବିଭିନ୍ନ ଷ୍ଟେଶନକୁ ଯାଇପାରୁଛି। ହସ୍ପିଟାଲରେ ସ୍ଥାୟୀ ଡାକ୍ତରମାନେ ରୋଗୀଙ୍କୁ ପରାମର୍ଶ ଦେବା ସହ ବିଭିନ୍ନ ପ୍ରକାର ପରୀକ୍ଷା କରାଯାଉଛି। ଏହାସହ ବହୁ ସମୟରେ ଅସ୍ଥାୟୀ ଭାବେ ଅନେକ ବିଶେଷଜ୍ଞ ହସ୍ପିଟାଲକୁ ଆସି ସେବା ଯୋଗାଇ ଦେଉଛନ୍ତି। ରୋଗୀଙ୍କୁ ଔଷଧ ମଧ୍ୟ ଯୋଗାଇ ଦେବାର ବ୍ୟବସ୍ଥା ରଖାଯାଇଛି ।
ମାର୍ଚ୍ଚ ୨୦୨୬ ସୁଦ୍ଧା ଏହି ହସ୍ପିଟାଲ ଡିଭିଜନରେ ୨୮ଟି ଚିକିତ୍ସା ଶିବିର ଆୟୋଜନ କରି ୪,୩୨୧ ରୋଗୀଙ୍କୁ ଚିକିତ୍ସା ସେବା ଯୋଗାଇ ଦେଇସାରିଛି।
