ଏମ୍. ନାଗରାଜୈହ ବେଙ୍ଗାଲୁରୁର ବସ୍ତିରେ ରହୁଥିବା ପିଲାଙ୍କ ଭବିଷ୍ୟତ ଗଢ଼ିବା ଲାଗି ଚେଷ୍ଟା ଜାରି ରଖିଛନ୍ତି। ସେ ଅଧାରୁ ପାଠ ଛାଡ଼ିଦେଇଥିବା ଏବଂ ଶିଶୁ ଶ୍ରମିକ ଭାବରେ ଜୀବନ ବିତାଉଥିବା ପିଲାଙ୍କୁ ଉଦ୍ଧାର କରି ପଢ଼ାଉଛନ୍ତି। ଏହି କାର୍ଯ୍ୟ ପାଇଁ ସେ ପ୍ରଗତି ଚାରିଟେବଲ୍ ଟ୍ରଷ୍ଟ ଗଢ଼ିଛନ୍ତି। ଏହି ଟ୍ରଷ୍ଟ ଦ୍ୱାରା ୨୦ ବର୍ଷ ହେଲା ସେ ପିଲାଙ୍କୁ ପାଠ ପଢ଼ାଇ ଆସୁଛନ୍ତି। ବେଙ୍ଗାଲୁରୁର ବସ୍ତିଗୁଡ଼ିକରେ ରହୁଥିବା ଶ୍ରମିକ ପରିବାରର ପିଲାମାନେ ମାତାପିତାଙ୍କ ସାଙ୍ଗରେ କାର୍ଯ୍ୟ କ୍ଷେତ୍ରକୁ ଯାଇଥାନ୍ତି। ଅନେକେ ଅଧାରୁ ପାଠ ଛାଡ଼ି ଶିଶୁ ଶ୍ରମିକ ହୋଇଯାଆନ୍ତି। ଶିଶୁଙ୍କର ଏଭଳି ସମସ୍ୟାକୁ ଲକ୍ଷ୍ୟକରି ନାଗରାଜୈହ ସେମାନଙ୍କୁ ପୁନର୍ବାର ସ୍କୁଲକୁ ଫେରାଇ ଆଣିବା ପାଇଁ ନିଷ୍ପତ୍ତି ନେଇଥିଲେ। ଏହି ପିଲାଙ୍କ ପାଇଁ ସେ କେମ୍ପାପୁରା, ସୁମନହାଲି ଏବଂ ଅମ୍ରୁଥାଲିରେ ତିନୋଟି ଶିକ୍ଷାକେନ୍ଦ୍ର ଖୋଲିଛନ୍ତି। ଏଠାରେ ୯.୩୦ରୁ ଅପରାହ୍ନ ୩ଟା ପର୍ଯ୍ୟନ୍ତ ପିଲାଙ୍କୁ ପଢ଼ାଯାଉଛି। ସେମାନଙ୍କୁ ମୁଖ୍ୟତଃ ଇଂଲିଶ, କନ୍ନଡ, ଗଣିତ ଓ ହିନ୍ଦୀ, ଚିତ୍ରାଙ୍କନ, ନୃତ୍ୟ ଓ ପେଣ୍ଟିଂ ଶିକ୍ଷା ଦିଆଯାଉଛି। ଅନେକ ସ୍ବେଚ୍ଛାସେବୀ ବି ପିଲାଙ୍କୁ ପଢ଼ାଉଛନ୍ତି। ନାଗରାଜୈହ ସବୁ ଶିକ୍ଷାକେନ୍ଦ୍ରକୁ ଦାନ ଆକାରରେ ମିଳୁଥିବା ଅର୍ଥରେ ଚଳାଇ ଆସୁଛନ୍ତି। ପିଲାମାନେ ଶିକ୍ଷାକେନ୍ଦ୍ରରେ ପ୍ରାରମ୍ଭିକ ଶିକ୍ଷା ପାଇବା ପରେ ସେମାନଙ୍କ ନାମ ସରକାରୀ ସ୍କୁଲରେ ଲେଖାଯାଉଛି।
