ମାତ୍ର ୪ ବର୍ଷ ବୟସରେ ଦିନକୁ ୪୦ କିଲୋମିଟର ପଦଯାତ୍ରା! ତାହା ପୁଣି ବାପାଙ୍କ ପ୍ରତି ଥିବା ଭଲପାଇବା କାରଣରୁ। ଏଭଳି କାମ କରି ସମସ୍ତଙ୍କ ପାଇଁ ପ୍ରେରଣା ପାଲଟିଛନ୍ତି ନେମେଶ୍ୱରୀ। ମହାରାଷ୍ଟ୍ର ନାସିକ ଜିଲ୍ଲାର ଏହି ଛୋଟ ଝିଅଟି ଏବେ ନର୍ମଦା ପରିକ୍ରମା କରୁଛନ୍ତି। ଏଥିପାଇଁ ସେ ପ୍ରତିଦିନ ୩୦ରୁ ୪୦ କିଲୋମିଟର ଖାଲି ପାଦରେ ଚାଲୁଛନ୍ତି। ପ୍ରକୃତରେ ବର୍ଷେ ପୂର୍ବରୁ ନେମେଶ୍ୱରୀ ପରିକ୍ରମା ନିମନ୍ତେ ସଙ୍କଳ୍ପ କରିଥିଲେ। ୨୦୨୨-୨୦୨୩ରେ ତାଙ୍କ ବାପା ବାଲୁବାଲୁ ବୋଡ୍କେ ନର୍ମଦା ପରିକ୍ରମା କରୁଥିଲେ। ସେ ସମୟରେ ନେମେଶ୍ୱରୀ ଈଶ୍ୱରଙ୍କୁ ପ୍ରାର୍ଥନା କରିଥିଲେ ବାପା ଭଲରେ ଘରକୁ ଫେରି ଆସିଲେ ସେ ନର୍ମଦା ପରିକ୍ରମା କରିବେ। ବାପା ଘରକୁ ଫେରିଆସିବା ପରେ ପ୍ରଭୁଙ୍କ ନିକଟରେ କୃତଜ୍ଞତା ସ୍ବରୂପ ନେମେଶ୍ୱରୀ ଏବେ ନର୍ମଦା ପରିକ୍ରମା ଆରମ୍ଭ କରିଛନ୍ତି। ଏତେ କମ୍ ବୟସରେ ଏମିତି ଏକ ଦୁଃସାହସିକ ପଦକ୍ଷେପ ନେଇ ସେ ସମସ୍ତଙ୍କୁ ଚକିତ କରି ଦେଇଛନ୍ତି। ନେମେଶ୍ୱରୀଙ୍କ ମାତାପିତା ମଧ୍ୟ ତାଙ୍କ ସହ ଏହି ଯାତ୍ରାରେ ସାମିଲ୍ ହୋଇଛନ୍ତି। ଏବେ ଏତେ ଖରା ଓ ଗରମରେ ମଧ୍ୟ ନେମେଶ୍ୱରୀ ତାଙ୍କ ସଙ୍କଳ୍ପରୁ ଓହରି ଯାଇ ନାହାନ୍ତି। ଅବିଚଳିତଭାବେ ସେ ଆଗେଇ ଚାଲିଛନ୍ତି। ତାଙ୍କୁ ଦେଖି ଆଶ୍ଚର୍ଯ୍ୟ ହେବା ସହ ମାଆ ନର୍ମଦାଙ୍କର ଆଶୀର୍ବାଦରୁ ଏସବୁ ସମ୍ଭବ ବୋଲି ଲୋକେ କହୁଛନ୍ତି।
