ଜାଗା କହିଲେ ମାତ୍ର ୧୦୦ ବର୍ଗଫୁଟ। ତାହା ପୁଣି ଗୋଟିଏ ଛୋଟ ଘର। କିନ୍ତୁ ସେଥିରେ କେଶର ଚାଷ କରି ନୋଏଡାର ଇଞ୍ଜିନିୟର ରମେଶ ଗେରା ଲକ୍ଷାଧିକ ଟଙ୍କା ରୋଜଗାର କରିପାରୁଛନ୍ତି। ରମେଶଙ୍କ ବୟସ ୬୪। ସେ ଏନ୍ଆଇଟି କୁରୁକ୍ଷେତ୍ରରୁ ଇଲେକ୍ଟ୍ରିକାଲ ଇଞ୍ଜିନିୟରିଂରେ ଡିଗ୍ରୀ ହାସଲ କରିବା ପରେ ଚାକିରି କରିଥିଲେ। ଦୀର୍ଘ ୩୫ ବର୍ଷ ବୃତ୍ତିଗତ ଜୀବନରୁ ଅବସର ନେଇ କେଶର ଚାଷ ଆରମ୍ଭ କରିଥିଲେ। ଭାରତୀୟ ଜଳବାୟୁରେ କେବଳ କଶ୍ମୀରରେ କେଶର ଚାଷ ହୁଏ। କିନ୍ତୁ ରମେଶ ଏହି ଚାଷ ନୋଏଡାରେ କରି ଉଦାହରଣ ସୃଷ୍ଟି କରିଛନ୍ତି। ଏହି ଚାଷ ସମ୍ପର୍କରେ ସେ ଦକ୍ଷିଣ କୋରିଆରୁ ଶିକ୍ଷା ହାସଲ କରିବା ପରେ ସଫଳତା ପାଇଛନ୍ତି। ଆଶ୍ଚର୍ଯ୍ୟର ବିଷୟ ହେଉଛି ଏହି ଚାଷ ଘର ଭିତରେ କରାଯାଉଛି। ଚାଷର ଗୋଟିଏ ପର୍ଯ୍ୟାୟ ପାଇଁ ୪ ମାସ ସମୟ ଲାଗୁଛି ଓ ଅମଳ ମଧ୍ୟ ଅଧିକ ହେଉଛି। ୧୦୦ ବର୍ଗଫୁଟ ଜାଗାରେ ଚାଷ କରିବା ପାଇଁ ବିଦ୍ୟୁତ୍ ଖର୍ଚ୍ଚ ୫ ହଜାର ଲାଗୁଛି। ଏହି ଚାଷ ପାଇଁ ରମେଶ ପ୍ରଥମେ ୨ ଲକ୍ଷ ଟଙ୍କା ଖର୍ଚ୍ଚ କରି କଶ୍ମୀରରୁ ମଞ୍ଜି ସଂଗ୍ରହ କରିଥିଲେ। ଏବେ ତାଙ୍କ ଅମଳ ବଢ଼ିଛି ଓ ୧ କେଜି କେଶରକୁ ୨ରୁ ୩ ଲକ୍ଷ ଟଙ୍କା ମଧ୍ୟରେ ବିକ୍ରି କରୁଛନ୍ତି।
