ବୃତ୍ତି ପାଇଁ ସଂଗ୍ରାମ କରିଛନ୍ତି ଆସାମର ଦିଗନ୍ତ ଦାସ। ବୃତ୍ତିକୁ ବି ସମ୍ମାନ ଦେଇଛନ୍ତି ଓ ସେହି ଆୟରେ ସେ ଆଗକୁ ବଢ଼ି ଜଣେ ସଫଳ ବ୍ୟବସାୟୀ ହୋଇପାରିଛନ୍ତି। ଦିଗନ୍ତ ଏବେ ୪ଟି ସହରକୁ ଫ୍ରେସ୍ ପରଟା ଯୋଗାଇ ଦେଉଛନ୍ତି। ଏଭଳି ଖାଦ୍ୟ ବ୍ୟବସାୟ କଥା ଶୁଣିଲେ ଆଶ୍ଚର୍ଯ୍ୟ ଲାଗୁଥାଇପାରେ। କିନ୍ତୁ ଦିଗନ୍ତ ଏଥିରେ ସଫଳ ହେବା ସହ ୨୦ ଜଣଙ୍କୁ ନିଯୁକ୍ତି ଦେଇଛନ୍ତି। ସେ ପ୍ରତିଦିନ ୧,୫୦୦ରୁ ଅଧିକ ପରଟା ତାଙ୍କ ଟିମ୍ ମାଧ୍ୟମରେ ସୋନିତପୁର, ଲକ୍ଷିମପୁର, ଧିମାଜି ଓ ଦିବ୍ରୁଗଡ଼କୁ ପଠାଉଛନ୍ତି। ଦିଗନ୍ତଙ୍କ ବୟସ ଏବେ ୩୨। ଏହି ଯୁବ ଉଦ୍ୟୋଗୀ ପ୍ରଥମେ ଜଣେ ଖଣି ଶ୍ରମିକ ଥିଲେ। ପରେ ସୁରକ୍ଷା ଗାର୍ଡ ଭାବେ କାମ କରିଥିଲେ। ଏହି ସମୟରେ ସେ ଏଭଳି ବ୍ୟବସାୟ ଆରମ୍ଭ କରିବାକୁ ନିଷ୍ପତ୍ତି ନେଲେ ଓ ଏବେ ସେ ଏଥିରେ ସଫଳତା ପାଇପାରିଛନ୍ତି। ଦିଗନ୍ତ ଏହି କାର୍ଯ୍ୟ କୋଭିଡ୍ ମହାମାରୀ ପୂର୍ବରୁ ଆରମ୍ଭ କରିଥିଲେ ମଧ୍ୟ ମହାମାରୀ ସମୟରେ ବହୁ ଆହ୍ବାନର ସମ୍ମୁଖୀନ ହୋଇଥିଲେ। ପରେ ପୁଣି ନିଜ କାର୍ଯ୍ୟକୁ ବଢ଼ାଇ ଏବେ ୪ଟି ସହରକୁ ତାଙ୍କ ପରଟା ଯୋଗାଉଛନ୍ତି ଓ ଆଗକୁ ଏହାକୁ ଅନ୍ୟ ସବୁ ସହରକୁ ସମ୍ପ୍ରସାରିତ କରିବେ ବୋଲି କହନ୍ତି ଦିଗନ୍ତ। ସେ ଏହି ଖାଦ୍ୟ ବ୍ୟବସାୟ ‘ଡେଲି ଫ୍ରେସ୍ ଫୁଡ୍’ ୟୁନିଟ୍ ମାଧ୍ୟମରେ ଯୋଗାଇ ଦେଉଛନ୍ତି।
