୩୫ ଝିଅଙ୍କ ପିତା ଜଣେ। ଏକଥା ବିଶ୍ୱାସ ହେଉ ନ ଥିଲେ ବି ସତ। ଝାଡ଼ଖଣ୍ଡର ଦେଓଗଡ଼ ନିବାସୀ ୬୬ ବର୍ଷୀୟ ହରେରାମ ପାଣ୍ଡେ ହେଉଛନ୍ତି ସେହି ପିତା, ଯିଏ ୩୫ ଝିଅଙ୍କୁ ଲାଳନପାଳନ କରି ବଢ଼ାଉଛନ୍ତି। ସମସ୍ତେ ତାଙ୍କୁ ବାବା(ବାପା) ଡାକୁଛନ୍ତି। ମାତାପିତା ପ୍ରତିକୂଳ ପରିସ୍ଥିତିର ସମ୍ମୁଖୀନ ହୋଇ ଜନ୍ମ ପରେ ଝିଅମାନଙ୍କୁ ଜଙ୍ଗଲ ଓ ଟ୍ରେନ୍ରେ ଛାଡ଼ି ଚାଲିଯିବା ପରେ ସେମାନଙ୍କୁ ପାଣ୍ଡେ ଉଦ୍ଧାର କରିଛନ୍ତି। ସେ ନାରାୟଣ ସେବା ଆଶ୍ରମ ଗଠନ କରି ସେଠାରେ ଏମାନଙ୍କୁ ରଖିଛନ୍ତି। ସେ ପ୍ରଥମେ ତାପସୀ ନାମ୍ନୀ ଝିଅକୁ ଉଦ୍ଧାର କରିଥିଲେ। ତାକୁ ୨୧ ଦିନ ବ୍ୟାପୀ ଚିକିତ୍ସା ପରେ ସୁସ୍ଥ କରି ଘରକୁ ଆଣିଥିଲେ। ଏବେ ସେହି ଝିଅର ବୟସ ୧୯ । ତାପସୀର ଜନ୍ମଦିନରେ ସେ ଖୁସିଙ୍କୁ ଉଦ୍ଧାର କରିବା ପରେ ସେବାଶ୍ରମ ଗଠନ କରିଥିଲେ। ପାଣ୍ଡେ ଓ ତାଙ୍କ ସ୍ତ୍ରୀ ଏହି ଝିଅମାନଙ୍କ ଯତ୍ନ ନେଉଛନ୍ତି। ଦେଓଗଡ଼ ପୋଲିସ କିମ୍ବା ରେଲ୍ଓ୍ବେ କର୍ମଚାରୀମାନେ କୌଣସି ପରିତ୍ୟକ୍ତ ସ୍ଥାନରେ ଝିଅଟିଏ ଦେଖିଲେ ତୁରନ୍ତ ପାଣ୍ଡେଙ୍କୁ ଖବର ଦେଉଛନ୍ତି। ପାଣ୍ଡେ ଏବେ ୩୫ ଝିଅଙ୍କ ସହ ୪୦ ସଦସ୍ୟ ବିଶିଷ୍ଟ ପରିବାର ପ୍ରତିପୋଷଣ କରୁଛନ୍ତି। ମାସକୁ ପାଖାପାଖି ୧.୫ ଲକ୍ଷ ଟଙ୍କା ଖର୍ଚ୍ଚ କରୁଛନ୍ତି। ଅନେକ ଝିଅଙ୍କୁ ସେ ଡିଏଭିରେ ନାମ ଲେଖାଇଛନ୍ତି। ଅନୁଦାନ ଓ ସ୍ବରୋଜଗାରରେ ସେ ଆଶ୍ରମକୁ ଚଳାଉଥିଲେ ବି ଅର୍ଥାଭାବ ଦେଖାଯାଉଛି। ତଥାପି ଅବିଚଳିତ ଭାବେ ତାଙ୍କ ବଡ଼ ପରିବାରକୁ ଚଳାଇବାରେ ଅବହେଳା କରିନାହାନ୍ତି ପାଣ୍ଡେ।
