ବୁଲାପ୍ରାଣୀଙ୍କ ପେଟ ଭରିବା ସହ ସେମାନଙ୍କ ସେବାରେ ସଦା ବ୍ୟସ୍ତ ରହୁଛନ୍ତି ଗାଜିଆବାଦର ନୀହାରିକା ରାଣା। ସେ ପ୍ରତିଦିନ ୧୦୦ଟି ବୁଲାକୁକୁରଙ୍କୁ ଖାଇବାକୁ ଦେଉଛନ୍ତି। ଏବେ ସୁଦ୍ଧା ସେ ମୋଟରେ ୫୦୦ ବୁଲା କୁକୁରଙ୍କୁ ଉଦ୍ଧାର କରିସାରିଲେଣି। ନୀହାରିକାଙ୍କ ବୟସ ଏବେ ୨୫। ସେ ୩ ବର୍ଷ ହେଲା ଆହତ ପ୍ରାଣୀଙ୍କୁ ଉଦ୍ଧାର କରୁଛନ୍ତି। ଏହି ଅଭିଯାନ ନିଜେ ଓ ନିଜ ଚାକିରି ଆୟରୁ ଖର୍ଚ୍ଚ କରୁଛନ୍ତି। ପିଲାବେଳୁ ନୀହାରିକା ରାସ୍ତାରେ ବୁଲୁଥିବା କୁକୁରମାନଙ୍କୁ ଖାଇବାକୁ ଦେଉଥିଲେ। ସେ ତାଙ୍କ କଲେଜ ପ୍ରୋଜେକ୍ଟ ପାଇଁ ପ୍ରାଣୀ ଉଦ୍ଧାର କରିବା କାର୍ଯ୍ୟକୁ ଚୟନ କରିଥିଲେ, ଯେଉଁଥିରେ ସେ ରାସ୍ତାରେ ବୁଲି ଆହତ କିମ୍ବା ରୋଗଗ୍ରସ୍ତ କୁକୁରମାନଙ୍କୁ ସାହାଯ୍ୟ କରୁଥିଲେ। କିଛିଦିନ ପରେ ଏହି ପ୍ରୋଜେକ୍ଟ ଶେଷ ହୋଇଯିବା ପରେ ସେ ଆଉ ତାହା ବନ୍ଦ କରି ନ ଥିଲେ। କୋଭିଡ୍ ମହାମାରୀ ସମୟରେ ସେ ଏହି କାର୍ଯ୍ୟକୁ ବଢ଼ାଇଥିଲେ। ସେତେବେଳେ ସେ ପ୍ରଥମେ ୨୫ଟି କୁକୁରଙ୍କୁ ଖାଇବାକୁ ଦେଉଥିଲେ ଓ ତାହା ବଢି ୧୨୦ରେ ପହଞ୍ଚିଥିଲା। କୋଭିଡ୍ ସମୟରେ ନୀହାରିକା ଘରପାଖରୁ ୧୦ କି.ମି. ଦୂର ଯାଇ କୁକୁରଙ୍କୁ ଖାଇବାକୁ ଦେଉଥିଲେ। ପ୍ରତିଦିନ ସକାଳୁ ଉଠି ସେ ଖାଦ୍ୟ ପ୍ରସ୍ତୁତ କରି ତାହାକୁ ନେଇ ରାସ୍ତାକୁ ବାହାରିଯାଉଛନ୍ତି।
