ମୋରଡା,୮।୧୦(ଡି.ଏନ.ଏ): ମୟୂରଭଞ୍ଜ ଜିଲା ରାସଗୋବିନ୍ଦପୁର ରେଞ୍ଜ ଅଧୀନ ତଥା ମୋରଡ଼ା ବ୍ଲକର ସଦରମହକୁମା ଚିତ୍ରଡ଼ାର ମୁଖ୍ୟ ବଜାର ଓ ଗାଁରେ ଶୁକ୍ରବାର ଭୋରରେ ଏକ ଦନ୍ତା ହାତୀ ଆତଙ୍କ ଖେଳାଇଛି। ପଡ଼ୋଶୀ ପଶ୍ଚିମବଙ୍ଗରୁ ଆସିଥିବା ଉକ୍ତ ହାତୀ ତଳସାହି ଗାଁ ଦେଇ ଚିତ୍ରଡ଼ା ବଜାରକୁ ପ୍ରବେଶ କରିଥିଲା। ପରେ ଚିତ୍ରଡ଼ାର ମହାଦେବ ସାହି, କଚାସାହି, ଡୁମୁରଡିହା ଉପଦ୍ରବ କରି ନିକଟସ୍ଥ ଜଙ୍ଗଲକୁ ଚାଲିଯାଇଛି। ହାତୀଟି ମହାଦେବ ସାହିର ଅମୀୟ କୁମାର ସାହୁଙ୍କ ଘର ଭାଙ୍ଗି ଦେଇଥିବା ବେଳେ ସନ୍ତୋଷ କୁମାର ସାହୁଙ୍କ ଘର କବାଟ ଭାଙ୍ଗି ଧାନ ଖାଇବା ସହ ନଷ୍ଟ କରିଛି। ସେହିପରି କଚାସାହିର ଜଣେ ବ୍ୟକ୍ତିଙ୍କ ଘର କବାଟ ଭାଙ୍ଗି ଧାନ ଖାଇ ନଷ୍ଟ କରିଥିବା ଜଣାପଡ଼ିଛି। ଏନେଇ ରାସଗୋବିନ୍ଦପୁର ରେଞ୍ଜର ପ୍ରଶାନ୍ତ କୁମାର ବେହେରା କହିଛନ୍ତି, ଉକ୍ତ ହାତୀ ଏକୁଟିଆ ପଶ୍ଚିମବଙ୍ଗରୁ ଆସିଥିବା ବେଳେ ଏବେ ଜଙ୍ଗଲରେ ଅଛି। ହାତୀର ଗତିବିଧି ଉପରେ ବନ ବିଭାଗ ନଜର ରଖିଛି। ତେବେ କ୍ଷତିଗ୍ରସ୍ତ ନେଇ ରିପୋର୍ଟ ରାଜସ୍ବ ବିଭାଗ ବନ ବିଭାଗକୁ ଦେଲେ ସାତଦିନ ଭିତରେ ଲୋକଙ୍କୁ କ୍ଷତିପୂରଣ ଦିଆଯିବ।
